ជារៀងរាល់ថ្ងៃនៅតាមបណ្ដាកាសែត ទស្សនាវដ្តី ទូរទស្សន៍ វិទ្យុ
និងគេហទំព័រសារព័ត៌មាននានា
តែងតែចុះផ្សាយអត្ថបទពីគ្រោះថ្នាក់ចរាចរណ៍
ដែលបង្កឲ្យរងរបួសស្រាល ធ្ងន់
ឬក៏រហូតដល់បាត់បង់ជីវិតយ៉ាងសង្វេគទៀតផង។
ហេតុដែលបណ្តាលឲ្យ មានគ្រោះថ្នាក់ចរាចរណ៍នេះ
ច្រើនតែបណ្តាលមកពីកង្វះការទទួលខុសត្រូវ
និងកង្វះសុជីវធម៌ក្នុងការបើកបរ។
បើតាមរបាយការណ៍របស់ប៉ូលិសចរាចរផ្លូវគោកបានឲ្យដឹងថា
គ្រោះថ្នាក់ចរាចរណ៍បណ្តាលមកពីកត្តាមនុស្ស មានរហូតដល់៩៤ភាគរយ
ដែលក្នុងនោះរួមមានការបើកបរហួសល្បឿនកំណត់
ការបើកបរក្នុងឥទ្ធិពលនៃគ្រឿងស្រវឹង ការប្រជែង ធ្វេសប្រហែស
មិនគោរពសិទ្ធិអាទិភាព និងមិនគោរពភ្លើងសញ្ញាជាដើម។
ជាក់ស្តែង កាលពីប៉ុន្មានសប្តាហ៍មុន នៅតាមគេហទំព័រហ្វេសប៊ុក
និងបណ្តាញសារព័ត៌មានជាច្រើនបានចុះផ្សាយ
និងចែករំលែកនូវព័ត៌មានស្តីពីនិស្សិតពេទ្យម្នាក់បានបើកបរ
រថយន្តទំនើបបង្កបញ្ហាគ្រោះថ្នាក់ចរាចរណ៍សម្លាប់កុមារតូចៗយ៉ាង
អាណោចអាធ័មនៅក្បែរវិមានឯករាជ្យររហូតដល់មុខក្រសួងមហាផ្ទៃ។
ទង្វើ បើកបរដ៏គឃ្លើននេះ វាសបញ្ជាក់ថា ទាំងអត្ដសចរិត
និងការទទួលខុសត្រូវរបស់និស្សិតស្រីម្នាក់នេះ
បានបង្កគ្រោះថ្នាក់ដល់អ្នកដទៃពីម្នាក់ហើយទៅម្នាក់
និងច្រីននាក់ទៀតដែលកើតចេញពីការ ព្យាយាមបើករថយន្ដរត់គេច។
រីឯ ករណីមួយទៀត ដែលទើបតែកើតឡើងក្ដៅៗ
វាបង្កពីការប្រណាំងរថយន្ដកណ្ដាលទីក្រុងរបស់ចាស់ទំនើងដែល
មានតួនាទីធំក្នុងក្រសួងយុត្ដិធម៌
បានបង្កឲ្យមានគ្រោះថ្នាក់ចរាចរណ៍នៅពេលកណ្តាលអាធ្រាត។
ជាងនេះទៅទៀត
នៅពេលអ្នកកាសែតទៅផ្តិតយករូបភាពនៅកន្លែងកើតហេតុ
ក្រុមប្រណាំងរថយន្ដទាំងនោះបានវាយអ្នកសារព័ត៌មានរហូតដល់
របួសចូលមន្ទីរពេទ្យ នេះបើយោងតាមសារព័ត៌មានផ្សេងៗ
និងកាសែតភ្នំពេញប៉ុស្តិ៍ ដែលបានចុះផ្សាយកាលពីថ្ងៃព្រហស្បតិ៍
ទី២១ ខែមីនា កន្លងទៅនេះ។
ទាំងពីរករណីខាងលើ វាគ្រាន់តែជាឧទាហរណ៍ជាក់ស្តែង
ដែលបង្ហាញអំពីចរិត និងសុជីវធម៌របស់អ្នកបើកបរ
ដែលបង្កឲ្យមានគ្រោះថ្នាក់ចរាចរណ៍មួយចំនួនប៉ុណ្ណោះ។
ពាក់ ព័ន្ធនឹងការបើកបរនេះ យុវជន ទេព ពិសិដ្ឋ អាយុ២៨ឆ្នាំ
បានលើកឡើងនូវឧទាហរណ៍ពីអតីតភាពដ៏អាក្រក់មួយចំពោះគ្រួសាររបស់
លោកថា នៅពេលដែលពូ
និងម្តាយមីងរបស់លោកកំពុងតែធ្វើដំណើរនៅតាមដងផ្លូវត្រូវបាន
ម៉ូតូធំដែលបើកបរវ៉ាគេវ៉ាឯងបញ្ច្រាសទិសបុកយ៉ាងពេញទំហឹង។
លើក បានបន្ដថា ជាអកុសល
ពូរបស់លោកបានបាត់បង់ជីវិតភ្លាមៗនៅកន្លែងកើតហេតុ
រីឯម្ដាយមីងវិញ បានទទួលមរណភាពនៅពេលបញ្ជូនទៅដល់មន្ទីរពេទ្យ។
ការពិតទៅ មិនត្រឹមតែលោក ពិសិដ្ឋ
ម្នាក់ទេដែលត្រូវទទួលរងទុក្ខ
និងជួបបញ្ហាដោយសារគ្រោះថ្នាក់ចរាចរណ៍
ក៏មានប្រជាជនកម្ពុជាជាច្រើននាក់ទៀតបានជួបបញ្ហាស្រដៀងគ្នា
រហូតមានគ្រួសារមួយចំនួនបានធ្លាក់ខ្លួនក្រីក្រ
ដោយសារតែអ្នកទាំងនោះជាជំហរបង្គោលគ្រួសារបានបាត់បង់ជីវិត
ឬពិការពុំអាចរកចំណូលដើម្បផ្គត់ផ្គង់គ្រួសារបាន។
ទោះបីជា អ្នកបើកបរមួយចំនួនធ្វេសប្រហែសក៏ដោយ
ក៏មានអ្នកបើកបរផ្សេងទៀត
ប្រុងប្រយ័ត្នខ្ពស់ក្នុងការបើកបរដែរ។ លោក ស្រេង ឡេង អាយុ៥០ឆ្នាំ
ជាអ្នកដែលតែងតែធ្វើដំណើរទៅមកដោយម៉ូតូ បានប្រាប់ឲ្យដឹងថា
នៅពេលដែលលោកបើកបរនៅតាមផ្លូវសាធារណៈម្តងៗ
លោកតែងតែប្រុងប្រយ័ត្នជានិច្ច
ព្រោះថាបើទោះបីជាលោកគោរពច្បាប់ចរាចរណ៍ ធ្វើដំណើរដោយសម្រួលក៏ដោយ
ក៏នៅតែមានគេជិះមកប្រជែង ជាពិសេស
ក្រុមមនុស្សដែលមានវ័យប្រមាណជាតិចជាង៣០ឆ្នាំ។
លោក បានបន្តថា ពួកគាត់បើកបរពុំដែលគោរពសិទ្ធិអាទិភាព
ភ្លើងសញ្ញា ឬច្បាប់ចរាចរណ៍អ្វីឡើយ ឲ្យតែអាចទៅមុនបាន
ពួកគាត់តែងតែជិះបំពាន។
មិនខុសពីលោកឡេងប៉ុន្មាននោះទេ យុវតីមួយរូប
ដែលកំពុងតែសិក្សានៅសាលាបច្ចេកទេសថែទាំវេជ្ជសាស្ត្រ
បានឲ្យដឹងថា
ពេលខ្លះមានអ្នកបើកបរមួយចំនួនមិនព្រមអធ្យាស្រ័យឲ្យគ្នានោះឡើយ
សូម្បីតែមួយវិនាទី ពួកគាត់តែងតែដណ្តើមឈ្នះរៀងៗខ្លួន។
នៅពេលមានផ្លូវស្ទះម្តងៗពួកគាត់តែងតែប្រជែងទៅមុខ
និងស៊ីផ្លេឲ្យគេចៀសផ្លូវជានិច្ច។
យុវតីដែលមានវ័យប្រមាណជា ២២ឆ្នាំរូបនេះបានលើកឡើងថា៖
«មានអ្នកខ្លះផ្លូវស្ទះសឹងស្លាប់ រកតែដកដង្ហើមទៅណាមិនបានផង
គាត់ចេះតែស៊ីផ្លេពេញផ្លូវឲ្យគេជៀស
ហើយមានអ្នកខ្លះទៀតជិះវ៉ាទៅវ៉ាមក
ឲ្យតែមានប្រឡោះអាចទៅបានដោយមិនខ្វល់ពីនរណាគេថាយ៉ាងម៉េចទេ។
មានពេលខ្លះទៀតគាត់ជិះមកកៀក ហើយប៉ះដៃម៉ូតូខ្ញុំ
ឡើងភ័យស្ទើរតែដួលម៉ូតូផងក៏មានដែរ»។
ពាក់ព័ន្ធនឹងបញ្ហា គ្រោះថ្នាក់ចរាចរណ៍
និងសុជីវធម៌របស់អ្នកបើកបរនេះ លោក ចេវ ហាក់
នាយរងការិយាល័យនគរបាលចរាចរណ៍ផ្លូវគោករាជធានីភ្នំពេញ បានលើកឡើងថា
ទន្ទឹមនឹងអ្នកចេះបើកបរ មានប័ណ្ណបើកបរ
អ្នកក៏ត្រូវតែមានសុជីវធម៌ និងយោគយល់គ្នាផងដែរ
ដើម្បីបន្ថែមលើច្បាប់ដែលយើងចេះនោះ
ទើបអាចកាត់បន្ថយគ្រោះថ្នាក់ចរាចរណ៍។
ថ្វីដ្បិតតែសុជីវធម៌នៅក្នុងការបើកបរ
ពុំបានចែងនៅក្នុងច្បាប់ក៏ពិតមែន
ប៉ុន្តែបើពួកគាត់ពុំគោរពសិទ្ធិអាទិភាព បើកបរបំពានលើភ្លើងសញ្ញា
ស្លាកសញ្ញា បើកបរមិនត្រូវតាមគន្លង ច្បាប់នឹងធ្វើការផាកពិន័យ។
លោក ចេវ ហាក់ បានសំណូមពរថា៖ «សូមឲ្យអ្នកប្រើប្រាស់ផ្លូវ
រួមគ្នាដើម្បីកាត់បន្ថយការកកស្ទះ និងបញ្ហាគ្រោះថ្នាក់ចរាចរណ៍
ហើយអ្នកបើកបរទាំងអស់គួរតែគោរពច្បាប់ចរាចរណ៍
មានសុជីវធម៌នៅក្នុងខ្លួន និងចងចាំថាថ្ងៃនេះ និងថ្ងៃស្អែកថា
កុំឲ្យមានគ្រោះថ្នាក់ចរាចរណ៍»៕
ប្រភព ៖ ភ្នំពេញប៉ុស្តិ៍
No comments:
Post a Comment