ក្លិនស្អុយ ឆ្អេះឆ្អាប ទឹកប៉ប៉ិចប៉ប៉ាច់ រួមនឹងក្លិនបន្លែ
សាច់គ្រប់ប្រភេទ
បានក្លាយជាទិដ្ឋភាពដ៏សាមញ្ញមួយដែលប្រជាជនចំណាំហៅថា
នោះជាផ្សារធម្មតា ឬផ្សារត្រី ផ្សារបន្លែជាដើម។
ទីកន្លែង
តាំងលក់របស់របរសម្រាប់បរិភោគ បែរជាសិ្ថតនៅលើភក់ជ្រាំទៅវិញ។
តើអ្នកលក់ដូរបានគិតដល់អនាម័យដែរឬទេ?
ហើយតើចំណែកឯអ្នកទិញយកទៅបរិភោគវិញ
បានគិតគូរដល់សុខភាពរបស់ខ្លួនដែរអត់?
ស្រី្តមេផ្ទះមួយរូប
អ្នកស្រី ឆ លីដា
បានប្រាប់ពីបទពិសោធជាអ្នកដើរផ្សារជាង៤០ឆ្នាំថា៖
«ពិបាកមែនទែន ថ្វីដ្បិតតែបន្លែ ត្រី សាច់ នៅទីនោះ
មានតម្លៃថោកសមរម្យ ប៉ុន្ដែវាគគ្រិចខ្លាំងណាស់។
ក្នុងនាមខ្ញុំជាស្ដ្រីមេផ្ទះ
តែងតែគិតធ្វើយ៉ាងណាឲ្យទិញបានហូបគ្រប់
ដោយសារតែគ្រួសារយើងមិនសូវបរិបូរណ៍ដូចគេឯង»។
អ្នកស្រី
បានរអ៊ូរទាំថា នៅពេលមានភ្លៀងម្តងៗ
អ្នកស្រីលែងចង់ដើរផ្សារតែម្តង ជាពិសេសនៅពេលមកដល់ផ្ទះវិញ
អ្នកស្រីត្រូវតែលាងសម្អាតជើង ជាមួយអាល់កុល ពីព្រោះមេរោគ
និងដីកខ្វក់ អាចធ្វើឲ្យរមាស់ ឬហៅថា ទឹកស៊ីជើង។
ទាក់ទិនទៅ
នឹងអនាម័យ និងការលក់ដូរនៅតាមផ្សារប៉ប៉ិចប៉ប៉ាច់ទាំងនេះ
អ្នកស្រីសុខ អួច ដែលជាអាជីករលក់បន្លែនៅផ្សារសេនជូរីផ្លាហ្សា
បានពន្យល់ថា៖ «ផ្សារគគ្រិចអ្នកណាក៏ដឹងដែរ ប៉ុន្តែសំខាន់
យើងជាអ្នកលក់ត្រូវដាក់ឲ្យតែផុតពីដីទៅ វារួចហើយ»។
ស្រី្ត
វ័យ៦០ឆ្នាំប្លាយរូបនេះ មានបទពិសោធលក់បន្លែជាង៣០ឆ្នាំមកហើយ
ហើយអ្នកស្រីក៏បានសំណូមពរឲ្យអ្នកលក់ដូរ និងអតិថិជនទាំងអស់
ត្រូវចេះជួយគ្នាថែរក្សាអនាម័យផងដែរ។
អ្នកស្រី
បានលើកឡើងថា៖ «មានអ្នកទិញខ្លះ ដើរបោះសំរាមឲ្យពាសវាលពាសកាល
ខ្លះទៀត ខាសស្តោះតាមផ្លូវ អ៊ីចឹង ឲ្យមានអនាម័យម្តេចទៅ»។
ឆ្លើយ
តបនឹងបញ្ហាទាំងខាងលើ លោក កង ចយ ជាប្រធានអនាម័យផ្សារធំថ្មី
បានអះអាងថា៖ «ផ្សារណាក៏ដូចជាផ្សារណាដែរ
វាត្រូវធ្វើកិច្ចការ១០០ជំពូក មិនថាអនាម័យ
ឬរបៀបរៀបរយអីនោះទេ។ នៅពេលខាងខ្ញុំដើរត្រួតពិនិត្យ
ពួកគាត់ដាក់លើរានលក់ត្រឹមត្រូវ
ប៉ុន្ដែគ្រាន់តែដើរផុតកន្ទុយភ្នែកបន្តិច ក៏មានអាជីករខូចខ្លះ
លួចដាក់លយ ឬដាក់លើដីដដែល ពីព្រោះធ្វើអ៊ីចឹង ពួកគាត់យល់ថា
អ្នកទិញឆាប់ឃើញ ហើយលក់ក៏ឆាប់ដាច់ដែរ»។
លោក ចយ
បានបញ្ជាក់ទៀតថា ចំពោះអ្នកដែលបំពានបទប្បញ្ញត្តិលក់
ដើម្បីសណ្តាប់ធ្នាប់ល្អ និងអនាម័យផ្សារ ខាងលោក
ត្រូវធ្វើការណែនាំតាមរយៈការប្រកាសមេក្រូ
ឬក៏ចុះទៅពន្យល់ផ្ទាល់ មុននឹងឈានដល់ការផាកពិន័យ។
ប្រធាន
អនាម័យផ្សាររូបនេះ បានសង្កត់ធ្ងន់ថា៖
«ការដែលអនុវត្តនីតិវិធីបែបនេះ
ជាវិធីមួយដើម្បីទាក់ទាញភ្ញៀវឲ្យចូលមកផ្សាររបស់យើង
ព្រោះថាក្រៅពីតម្លៃទំនិញថោកសមរម្យ កាលណាផ្សារយើងស្អាត
មិនមានក្លិនស្អុយ ឆ្អាប
អ្នកទិញប្រាកដជាចូលចិត្ដមកទិញនៅទីនេះមិនខាន»។
ពាក់ព័ន្ធ
នឹងបញ្ហាសុខភាព លោកវេជ្ជបណ្ឌិត សិទ្ធ ចន្ថា បានពន្យល់ថា៖
«ជាធម្មតា
បន្ថែសាច់មួយចំនួនបានផ្ទុកសារធាតុគីមីរួចជាស្រេចហើយ
ហើយនៅពេលមកដាក់លក់ក្នុងទីផ្សារកខ្វក់ទៀត ត្រី សាច់
និងបន្លែទាំងនោះ អាចនឹងឆ្លងមេរោគ។
ប្រសិនបើអ្នកទិញមិនបានលាងទឹកឲ្យស្អាតល្អទេនោះ
វានឹងអាចបង្កផលប៉ះពាល់ដល់សុខភាពរបស់ពួកគេ»។
លោកវេជ្ជ
បណ្ឌិត បានអះអាងថា ការប៉ះពាល់រយៈពេលខ្លី
គឺក្រោយពេលដែលយើងទទួលទានក្នុង៤៨ម៉ោង យើងអាចរាករូស។
រីឯផលប៉ះពាល់រយៈពេលវែងវិញ អ្នកពិសាអាចនឹងមានជំងឺមហារីកក្រពះ
ឬពោះវៀនជាដើម។
ចំពោះដំណោះស្រាយវិញ លោកវេជ្ជបណ្ឌិត ចន្ថា
បានផ្តល់ជាមតិយោបល់ថា៖ «ដើម្បីសុខភាព
អ្នកទិញគួរតែមើលពីការដាក់លក់របស់អ្នកលក់ ដូចជា
បើពួកគាត់ដាក់ខ្ពស់ពីដី នោះអនាម័យវាក៏គ្រាន់បើបន្ដិច
ហើយអ្វីដែលសំខាន់បំផុតនោះគឺ ត្រូវតែលាងសម្អាតបន្ថែ
ឬសាច់ឲ្យបានស្អាតមុននឹងទទួលទាន ឬយកទៅចម្អិន»។
យ៉ាងណាមិញ
ចំពោះយុវវ័យមួយចំនួនដែលមិនចង់ឃើញទិដ្ឋភាពស្អុយកខ្វក់នៅតាម
ផ្សារត្រីនានា ពួកគេបែរជាមកដើរផ្សារទំនើបជំនួសវិញ។
អាវ
ខៀវផ្ទៃមេឃ សំពត់បត់ខ្លី ដែលបង្ហាញពីឯកសណ្ឋានជានិស្សិត
កញ្ញាផាន ច័ន្ទរតនា វ័យ១៩ឆ្នាំ មិនចូលចិត្តដើរផ្សារបន្លែទេ
ពីព្រោះនៅទីនោះ គ្មានអនាម័យទេ។
កញ្ញា បានបន្ដថា៖
«ខ្ញុំមិនសូវជាទៅផ្សារទេ ប៉ុន្ដែបើមានពេល
ខ្ញុំជ្រើសរើសដើរផ្សារទំនើបវិញ ព្រោះវាស្អាត និងមានអនាម័យ»។
កញ្ញា
ច័ន្ទរតនា បានបញ្ជាក់ថា៖
«បើសិនជាផ្សារត្រីមិនមានទឹកហូរប៉ប៉ិចប៉ប៉ាច់
ឬក្លិនស្អុយនោះទេ ខ្ញុំពិតជាឧស្សាហ៍មកទិញហើយ។ ម៉្យាងវិញទៀត
ដើម្បីឲ្យងាយស្រួលដើរទិញអីវ៉ាន់
ខ្ញុំសំណូមពរឲ្យអ្នកលក់ទាំងអស់ដាក់ទំនិញគាត់ក្នុងស្តង់
ត្រឹមត្រូវ ព្រោះការដាក់ទំនិញលើដី មើលទៅគ្មានអនាម័យ
និងស្ទះផ្លូវពិបាកដើរណាស់»។
ដូច្នេះ ដើម្បីសុខភាព LIFT
សូមធ្វើការអំពាវនាវទាំងអាជីវករ
និងអតិថិជនទាំងអស់ជួយគ្នាថែរក្សាអនាម័យផ្សារ ដូចជា
ត្រូវបោះចោលសំរាមក្នុងធុងសំរាម ឬក៏ចាក់ទឹកកខ្វក់ទៅក្នុងលូ។
ម្យ៉ាង
វិញទៀត
សូមអាជីវករផ្សារទាំងអស់ដាក់លក់ទំនិញរបស់ខ្លួនឲ្យខ្ពស់ហួសពី
ដីដែលសម្បូរមេរោគ
ដោយយោងតាមកម្រិតស្តង់ដារគឺមានរយៈកម្ពស់១,២ម៉ែត្រ៕
ប្រភព ៖ ភ្នំពេញប៉ុស្តិ៍
No comments:
Post a Comment