សម្រាប់ទស្សនៈប្រជាជនអឺរ៉ុបភាគច្រើនចូលចិត្ដនិយមស្បែកពណ៌
សូកូឡា ប៉ុន្តែចំពោះប្រជាជនអាស៊ីវិញយើងឃើញថា
មនុស្សភាគច្រើនពេញចិត្ត និងឲ្យតម្លៃទៅលើសម្បុរស្បែកពណ៌ស។
ជាទូទៅ ស្រ្តីខ្មែរកើតមកមានសម្បុរស្បែកពណ៌សណ្តែកបាយពីធម្មជាតិ។
ដោយសារតែការយល់ឃើញថ្មីនិងពេញនិយមចំពោះស្បែកស
បានជំរុញឲ្យយុវវ័យភាគច្រើនព្យាយាមធ្វើយ៉ាងណាឲ្យមានសម្បុរស្បែក
ពណ៌សទោះបីជាពួកគេដឹងថាទង្វើបែបនេះអាចប៉ះពាល់ដល់សុខភាពស្បែក
ទៅថ្ងៃក្រោយ និងខាតបង់ប្រាក់កាក់យ៉ាងណាក៏ដោយ។
យុវវ័យបច្ចុប្បន្នព្យាយាមធ្វើយ៉ាងណាឲ្យទាន់សម័យទៅនឹងការ
ផ្លាស់ប្តូរថ្មីរបស់សង្គម។
បើទោះបីជាខ្លួនមានសម្រស់ស្អាតយ៉ាងណាក៏ដោយក៏នៅតែព្យាយាមខាត់
ស្បែកកាន់តែសថែមទៀត។
កញ្ញា លុយ គន្ធា អាយុ២៥ឆ្នាំ បាននិយាយថា៖ «ខ្ញុំយល់ថា
ស្បែកពណ៌ខ្មៅមិនស្អាតទេ ហើយក៏មិនគួរឲ្យចាប់អារម្មណ៍ដែរ។
មិត្តភក្តិរបស់ខ្ញុំភាគច្រើនមានសម្បុរស ហើយខ្ញុំយល់ថា
ស្បែកក៏ជាផ្នែកមួយដែលជួយលើកសម្រស់របស់ពួកគេផងដែរ។
មានវិធីជាច្រើនដែលពួកគេបានប្រើប្រាស់ដើម្បីធ្វើឲ្យស្បែកស
ស្រស់ស្អាត
ក្នុងនោះខ្ញុំក៏បានធ្វើតាមនូវវិធីសាស្រ្តមួយចំនួនតាមពួកគេដែរ
ដូចជាការបកស្បែកនិងលាបឡេដែលលាយស្រាប់ជាដើម»។
បើទោះបីជាពួកគេដឹងថា វិធីដែលពួកគេកំពុងតែប្រើ
វាប៉ះពាល់ទៅដល់ស្បែក និងខាតបង់ថវិកាក៏ដោយ
ក៏ពួកគេនៅតែមិនរារែកក្នុងការព្យាយាមធ្វើឲ្យស្បែកកាន់តែស
ទៀតនោះឡើយ។កញ្ញា គន្ធា បានបន្ថែមថា៖ «ខ្ញុំក៏ដឹងដែរថា
វាអាចប៉ះពាល់ទៅថ្ងៃអនាគតប៉ុន្តែមានមនុស្សជាច្រើននៅតែបន្ត
ធ្វើដូច្នេះដោយមិនខ្វល់អ្វីទាំងអស់»។
កញ្ញា គន្ធា
ធ្លាប់បានធ្វើការបកស្បែកឲ្យសប្រមាណជាពីរទៅបីដងរួចមកហើយ។
លើកដំបូង កញ្ញាទទួលបានលទ្ធផលជាទីគាប់ចិត្តក្នុងរយៈពេលដ៏ខ្លី។
បន្ទាប់ពីបានបកស្បែករួចហើយកញ្ញាចាំបាច់ត្រូវតែប្រើប្រាស់នូវ
ឡេការពារកម្តៅថ្ងៃដើម្បីជួយទប់ស្កាត់ការត្រឡប់មកកាន់សភាពដើម
វិញ។
ការពិតណាស់
មនុស្សមួយចំនួនមានសម្បុរស្បែកស្អាតស្រាប់ពីកំណើតប៉ុន្តែពួកគេ
នៅតែមិនទាន់ពេញចិត្តនឹងអ្វីដែលខ្លួនមាននោះទេ
ហើយពួកគេព្យាយាមធ្វើយ៉ាងណាឲ្យស្បែកកាន់តែសឡើងពីមួយថ្ងៃទៅ
មួយថ្ងៃ។ផលិតផលដែលដាក់លក់នៅលើទីផ្សារជាច្រើនត្រូវបានទទួល
ស្គាល់ និងត្រួតពិនិត្យយ៉ាងត្រឹមត្រូវមុននឹងចរាចរលើទីផ្សារ។
យ៉ាងណាមិញមនុស្សមួយចំនួននិយមនៅតែជាវផលិតផលដែលត្រូវបានផ្សែ
ផ្សំជាថ្មីដើម្បីជំនួយដល់ស្បែកឲ្យសនិងប្រសិទ្ធភាពរហ័សដោយមិន
បានយកចិត្តទុកដាក់ទៅដល់ផលប៉ះពាល់នោះទេ។
កញ្ញា អ៊ែម រស្មី អាយុ១៧ឆ្នាំ បាន
និយាយថា៖«ខ្ញុំនៅតែចង់ឲ្យស្បែកខ្ញុំសជាងនេះ
បើទោះបីជាខ្ញុំសព្វថ្ងៃមានសម្បុរសណ្តែកបាយក៏ដោយ។
ខ្ញុំក៏ធា្លប់មានការព្រួយបារម្ភចំពោះការប្រើប្រាស់ផលិតផលដែរ
ប៉ុន្តែក្រោយមកខ្ញុំគិតថា វាប្រហែលជាមិនអីទេ
ពីព្រោះបើមិនសាកល្បងក៏យើងមិនអាចទទួលបានផលប្រយោជន៍របស់វា
ដែរ»។
កញ្ញា បានបន្ថែមថា៖
«មុនពេលដែលខ្ញុំសម្រេចចិត្តជ្រើសរើសយកវិធីបកស្បែកឲ្យសខ្ញុំ
ក៏មានការព្រួយបារម្ភច្រើនដែរប៉ុន្តែដោយសារតែខ្ញុំបានឃើញមិត្ត
ភក្តិរបស់ខ្ញុំអាចទទួលបានលទ្ធផលដូចដែលពួកគេចង់បាន»។
មានមនុស្សមួយចំនួនយល់ថា
ចំណាប់អារម្មណ៍ចំពោះរូបសម្រស់ពិតជាសំខាន់
ពីព្រោះដំបូងឡើយយើងមិនបានធ្វើការពិចារណា
ឬក៏វាយតម្លៃពីអត្តចរិតខាងក្នុងឡើយ។មនុស្សមួយចំនួនតូចចូល
ចិត្តធ្វើការវាយតម្លៃទៅលើរូបរាងខាងក្រៅរបស់មនុស្ស។
តើវាពិតជា មានសារៈសំខាន់ណាស់មែនទេក្នុងការដែលទទួលស្គាល់ថា
ស្បែកពណ៌សពិតជាគួរឲ្យចាប់អារម្មណ៍?
កញ្ញា អ៊ុល វណ្ណែត អាយុ១៩ឆ្នាំ បានប្រាប់ឲ្យដឹងថា៖
«មនុស្សជាច្រើន ជាពិសេសបុរសៗ
តែងតែឲ្យតម្លៃទៅលើលក្ខណសម្បត្តិខាងក្រៅប៉ុណ្ណោះ។
បើរូបរាងខាងក្រៅមិនស្រស់ស្អាតនោះទេ
ពួកគេក៏មិនចាប់អារម្មណ៍ចង់ដឹងពីអត្តចរិតរបស់យើងដែរ។
ដូច្នេះខ្ញុំចំណាយលុយច្រើនគួរសមជាប្រចាំខែដោយគ្រាន់ទិញនូវ
ផលិតផលសម្អាងសម្រាប់ប្រើប្រាស់»។
យ៉ាងណាមិញលោក ប៉ែន ប្រុស បាននិយាយថា៖
«ជាការពិតនៅពេលដែលខ្ញុំក្រឡេកមើលទៅស្រីដែលស្អាត
ខ្ញុំក៏ចាប់អារម្មណ៍ទៅលើសម្បុរសដែរ
ប៉ុន្តែបើសិនជាខ្ញុំមានមិត្តស្រីឬក៏ប្រពន្ធវិញមិនចាំបាច់អី
ត្រូវធ្វើដល់ថា្នក់នោះទេ
ពីព្រោះវាអាចមានផលប៉ះពាល់ទៅថ្ងៃអនាគត»។
លោកបានបន្ថែមថា៖ «មានមនុស្សប្រុសជាច្រើនដឹងច្បាស់ណាស់ និងអាចកត់សម្គាល់បានចំពោះសម្រស់ពីធម្មជាតិរបស់ស្រ្តី»។
ទោះជាយ៉ាងណា
ក៏នៅមានវិធីថែរក្សាស្បែកតាមបែបធម្មជាតិដែលមានប្រសិទ្ធភាពហើយ
មានការពេញនិយមប្រើកាលពីជំនាន់មុនផងដែរ
ដូចជាការប្រើប្រាស់អម្ពិលទុំ ម្សៅល្មៀត ទឹកដោះគោឆៅ
ឬក៏ពងមាន់ស្រែជាដើម។
ថ្វីដ្បិតតែវាមិនមានប្រសិទ្ធភាពរហ័សដូចជាផលិតផលដែលមានជាតិ
គីមី ប៉ុន្តែវាក៏អាចផ្តល់អត្ថប្រយោជន៍ដល់ស្បែកយើងផងដែរ។
បច្ចុប្បន្ននេះ យុវវ័យមួយចំនួនចាប់អារម្មណ៍ចំពោះការប្រើប្រាស់
នូវផលិតផលធម្មជាតិទាំងនោះដែរ។ ជាក់ស្តែង កញ្ញា ម៉ែន ច័ន្ទមុទិតា
ជានិស្សិតឆ្នាំទី៤នៃវិទ្យាស្ថានស៊ីតិក បាននិយាយថា៖
«សម្រាប់ខ្ញុំផ្ទាល់ខ្ញុំប្រើប្រាស់ទាំងពីរប្រភេទ
ប៉ុន្តែភាគច្រើនខ្ញុំចូលចិត្តប្រើផលិតផលធម្មជាតិជាង
ពីព្រោះវាងាយស្រួល និងមិនសូវចំណាយថវិកាច្រើន។ ម្យ៉ាងទៀត
វាក៏អាចផ្តល់នូវលទ្ធផលដែលខ្ញុំពេញចិត្តដែរ»។
កញ្ញាបានបន្ថែមថា៖
«ខ្ញុំប្រើប្រាស់នូវពងមាន់ស្រែសម្រាប់លាបមុខ
ខ្ញុំសង្កេតឃើញថាបន្ទាប់ពីការប្រើរួចស្បែកមុខខ្ញុំមានសភាពតឹង
និងមានសំណើមដែលអ្នកអាចសាកល្បងបាន»។
អ្នកនាង អ៊ឹត ស្រីមុំ ជាអ្នក លក់គ្រឿងសម្អាងនៅផ្សារពោធិ៍ចិនតុង
បានថ្លែងថាយុវវ័យមួយចំនួនធំនិយមទិញផលិតផលដែលធ្វើឲ្យស្បែកស។
អ្នកនាងស្រីមុំ បានបញ្ជាក់ថា៖
«ផលិតផលដែលលាបសម្រាប់ឲ្យស្បែកសលក់ដាច់ជាងគេនៅក្នុងហាងរបស់
ខ្ញុំ។ ជាទូទៅមានមនុស្សជាច្រើននិយមប្រើប្រាស់ មិនថាចាស់
ឬក៏ក្មេងនោះទេ»។
អ្នកនាង បានលើកឡើងថា៖
«ផលិតផលប្រភេទហ្នឹងភាគច្រើនមានតម្លៃថ្លៃហើយអ្នកដែលប្រើប្រាស់
នឹងត្រូវការចំណាយច្រើន។
វាមិនមែនជាបញ្ហាទេដរាបណាអតិថិជនជ្រើសរើសយកនូវផលិតផលដែល
ត្រឹមត្រូវពីអ្នកឯកទេសជំនាញច្បាស់លាស់។
បញ្ហាស្ថិតត្រង់ថានៅពេលដែលអតិថិជនមួយចំនួនទិញឡេដែលលាយបន្ថែម
ដោយពុំមានការពិនិត្យត្រឹមត្រូវតាមក្បួនខ្នាត។
អ្នកស្រី គឹម សុធាវី អាយុ៥៦ឆ្នាំបានបន្ដថា៖
«កូនស្រីរបស់ខ្ញុំចំណាយប្រាក់ជាច្រើនលើសម្ភារប្រើប្រាស់
ជាពិសេសគ្រឿងសម្អាង។វាមិនមែនជាបញ្ហានោះទេដរាបណាគេខិតខំរៀន
សូត្រ»។
វាជាការពិតណាស់ដែលមនុស្សគ្រប់រូបចំាបាច់ត្រូវប្រើប្រាស់
គ្រឿងសម្អាងសម្រាប់ថែរក្សាសម្ផស្ស ប៉ុន្តែមុននឹងប្រើប្រាស់
យើងត្រូវគិតពិចារណាទៅលើទំហំនៃផលប៉ះពាល់ និងការចំណាយទៅលើវា។
មនុស្សមិនអាចវាយតម្លៃតែសម្បកខាងក្រៅនោះទេ៕
ប្រភព ៖ ភ្នំពេញប៉ុស្តិ៍
No comments:
Post a Comment