មើលកូន គេនៅផ្ទះខាងនោះ គេមានការងារគេល្អធ្វើ ហើយរកបានប្រាក់
រាប់រយរាប់ពាន់ដុល្លារក្នុងមួយខែៗ។»
តើពាក្យសម្តីនេះស្រដៀងនឹងអ្វីដែលអ្នកធ្លាប់បានឮពីឪពុកម្តាយ
ឬអ្នកនៅជុំវិញខ្លួនអ្នកដែរឬទេ?
ប្រសិនបើនិយាយចំពោះឪពុក
ម្តាយ វិញ ពាក្យមួយប្រយោគនេះអាចរាប់បានថា
ជាការប្រៀនប្រដៅមួយដែលពួកគាត់មានគោលបំណងចង់ឲ្យកូនៗខិតខំ
ប្រឹងប្រែងរៀនសូត្រ និងធ្វើការឲ្យបានប្រាក់បៀវត្សរ៍ច្រើន។
ដោយឡែក សម្រាប់កូនៗវិញ វាគឺអាចជាការស្តីបន្ទោស
និងជាសម្ពាធមួយសម្រាប់ពួកគេនៅក្នុងការសិក្សា និងអាជីពការងារ។
ជាងនេះ
ទៅទៀត សម្ពាធពីមិត្តភក្តិ ក៏ជាបញ្ហា ប្រឈមមួយដែរ
ដូចជាអ្នកទាំងនោះមានចំណេះដឹងប្រហាក់ប្រហែលគ្នា
ខ្លួនធ្វើការទទួលបានតំណែងទាប និងបានប្រាក់បៀវត្សរ៍តិច
ប៉ុន្តែមិត្តភក្តិដែលធ្វើការនៅកន្លែងដូចគ្នា ឬខុសគ្នានោះ
បែរជាទទួលបានការងារល្អប្រសើរ និងទទួលបានប្រាក់ចំណូលខ្ពស់ទៅវិញ។
សម្ពាធទាំងនេះ
បានក្លាយជា កត្តាមួយដែលនាំឲ្យការសិក្សា ឬក៏ការងារធ្លាក់ចុះ
នៅពេលដែលយុវវ័យកំពុងស្ថិតនៅក្នុងវ័យសិក្សា
ក៏ព្រោះតែយុវវ័យទាំងនោះចង់ប្រណាំងប្រជែងនឹងអ្នកទាំងនោះដើម្បី
លើកកម្ពស់គ្រួសារ និងមុខមាត់ខ្លួន។
ការរងសម្ពាធដោយពាក្យ
សម្តី ក្តី ឬពីមជ្ឈដ្ឋានជុំវិញខ្លួនក្តី
សុទ្ធតែជំរុញឲ្យមនុស្សម្នាក់ៗឲ្យខិតខំ ប្រឹងប្រែង
ប៉ុន្តែវាមិនប្រាកដទេថា
សម្ពាធទាំងនោះអាចធ្វើឲ្យមនុស្សម្នាក់នោះខ្លាំងជាងមុននោះ។
ផ្ទុយទៅវិញ
វាបែរជាអាចរុញច្រានមនុស្សម្នាក់នោះឲ្យធ្លាក់ចុះបាន។
ជាក់ស្តែង លោក ប៉ុន ណារិទ្ធ
ក្រោយពេលបញ្ចប់ការសិក្សាថ្នាក់ទី១២
គាត់ត្រូវជ្រើសមហាវិទ្យាល័យមួយសម្រាប់អនាគតការងារ។
ប៉ុន្តែគាត់មិនបានធ្វើតាមចំណង់ចំណូលចិត្តរបស់ខ្លួនក្នុងការ
ជ្រើសរើស មុខវិជ្ជាដែលចូលចិត្តទេ
គឺឪពុកម្តាយជាអ្នកជ្រើសរើសឲ្យ
ដោយមើលតាមស្ថានភាពអ្នកនៅជុំវិញខ្លួន
ហើយមិនគិតពីសមត្ថភាពរបស់កូន។ ក្រោយពេល លោក ណារិទ្ធ
សិក្សាបានមួយរយៈពេល លោកក៏ឈប់សិក្សា រួចចាប់ផ្តើមអាជីពការងារវិញ
ដោយហេតុថារៀនលែងចូល។
លោក ណារិទ្ធ បានបញ្ជាក់ថា៖
«ពេលនោះខ្ញុំចង់រៀនច្បាប់ ប៉ុន្តែប៉ាម៉ាក់មិនព្រម
ព្រោះគាត់គិតថាវាគ្រោះថ្នាក់ ហើយគាត់ចង់ឲ្យខ្ញុំរៀនពេទ្យ។
ចុងក្រោយមានតែធ្វើតាមគាត់»។
ដូចគ្នានេះដែរ
ស្ថិតក្នុងវ័យ២០ឆ្នាំ កញ្ញា ឃាង សត្ថាបូរ៉ាម៉ាណា
ជានិស្សិតទទួលបានអាហារូបករណ៍សិក្សានៅសហរដ្ឋអាមេរិក
ហើយសព្វថ្ងៃជាអ្នកបំពេញការងារស្ម័គ្រចិត្តម្នាក់បាននិយាយថា
ជារឿយៗកញ្ញាតែងឮឪពុកម្តាយនិយាយអំពីការងារ
និងការជោគជ័យរបស់អ្នកផ្សេងក្នុងវិស័យការងារ។
ទោះជានាងតែងគិតថា
អ្វីដែលឪពុកម្តាយនិយាយនេះក្នុងគោលបំណងឲ្យកញ្ញាធ្វើការងារកាន់
តែប្រសើរប៉ុន្តែម៉ាណានៅតែយល់ថា
រូបនាងក៏កំពុងតែរងសម្ពាធពីឪពុកម្តាយទៅវិញ។
អង្គុយរកនឹក
មួយ សន្ទុះ ម៉ាណាបានបន្តទៀតថា៖
«នេះជាអ្វីដែលធ្វើឲ្យខ្ញុំគឺជាខ្ញុំដូចសព្វថ្ងៃ
ដែលជាមនុស្សព្យាយាម និងជាអ្នកប្រកួតប្រជែង ម្នាក់»។
ក្រៅពីពាក្យ
សម្តីពីឪពុកម្តាយ មានសម្ពាធ
មួយទៀតដែលកើតចេញពីអ្នកដែលមានអាយុស្របាលគ្នា ដែលជាមិត្តភក្តិ
ឬអ្នកស្គាល់គ្នានិយាយពីការងារនិងប្រាក់ខែរបស់ពួកគេ
ពីប្រាក់ខែរបស់ អ្នកដទៃ ក៏អាចជាសម្ពាធមួយដែលជំរុញឲ្យយុវវ័យ
យើងព្យាយាមធ្វើតាមមិត្តភក្តិដែរ។ បើអ្នកទាំងនោះធ្វើបានសម្រេច
នោះវាជារឿងល្អមួយ ផ្ទុយទៅវិញ បើមិនអាចធ្វើបានសម្រេចទេ
នាំឲ្យពួកគេប្រឈមមុខនឹងសម្ពាធផ្លូវចិត្ត។
ជាក់ស្តែង លោក
ណារិទ្ធ មិនត្រឹមតែរងសម្ពាធពីឪពុកម្តាយតែមួយមុខនោះទេ
ប៉ុន្តែគាត់ក៏បានរងសម្ពាធពីមិត្តភក្តិដែលនិយាយពីការងាររបស់
ខ្លួនមានប្រាក់ខែខ្ពស់ផងដែរ។
នៅទីបញ្ចប់ យុវជនដែលរងសម្ពាធ
ព្រមទាំងការ សម្រេចចិត្តមិនឯករាជ្យតាមអ្វីដែលខ្លួនស្រឡាញ់ នោះ
មានអ្នកខ្លះភ្ញាក់ខ្លួន
ហើយត្រឡប់ទៅចាប់អាជីពណាមួយដែលខ្លួនពេញចិត្តវិញ ដូចជា ណារិទ្ធ
ជាដើម។ ប៉ុន្តែមានមួយចំនួនទៀត សម្រេចចិត្តធ្វើតាមអ្នកដ៏ទៃ
ហើយក៏រងសម្ពាធផ្លូវចិត្តនៅជាប់នឹងខ្លួនរហូតដល់បច្ចុប្បន្ន។
ដើម្បីបក
ស្រាយនៅបញ្ហាខាងលើ លោក សោម ច័ន្ទសុវណ្ណតារា
ដែលជាសាស្ត្រាចារ្យចិត្តវិទ្យានៃសាកលវិទ្យាល័យភូមិន្ទភ្នំពេញបាន
មានប្រសាសន៍ថា
វាគឺជាសម្ពាធមួយសម្រាប់យុវជនបើសិនជាពាក្យសម្តីទាំងនោះផ្តល់
ផលអវិជ្ជមានដល់ពួកគេ។ លើសពីនេះទៅទៀត
ប្រសិនបើពួកគាត់មិនអាចសម្រេចបាននូវអ្វីដែលឪពុកម្តាយរបស់គាត់
តម្រូវឲ្យធ្វើទេ នោះពួកគេនឹងមានបញ្ហាទាំងផ្លូវកាយ
និងផ្លូវចិត្តជាក់ជាមិនខាន។
លោកសាស្រ្តាចារ្យ
បានផ្តល់ជាយោបល់ទៅឪពុកម្តាយរបស់សិស្ស-និស្សិតថា៖
«មានតែការព្យាយាមស្វែងយល់រវាងឪពុកម្តាយ និងកូនទេ
ដែលអាចជាដំណោះស្រាយដ៏ល្អបំផុតដើម្បីកាត់បន្ថយនូវសម្ពាធរបស់
កូន និងឪពុកម្តាយ ដោយកូនត្រូវចេះឱនបន្តិច
ហើយឪពុកម្តាយចេះបន្ធូរបន្ថយបន្តិច នោះទើបជាការល្អ»។
ការ
ប៉ង ប្រាថ្នាខ្ពស់ជាអ្វីដែលមនុស្សគ្រប់រូបតែងតែមាន
ទោះជាយ៉ាងណាក៏ដោយ
ក៏អ្នកមិនគួរបណ្តោយឲ្យវាក្លាយជាសម្ពាធផ្លូវចិត្តទេ។
អ្នកគួរតែចេះប្រើវាក្នុងផ្លូវវិជ្ជមានសម្រាប់ត្រួសត្រាយអាជីព
ការងាររបស់អ្នកទៅថ្ងៃអនាគត។
លើសពីនេះទៅទៀតនោះ
យុវជនមិនគួរគិតខ្លាំងពេក
ឬប្រៀបធៀបខ្លួនជាមួយអ្នកដទៃហួសហេតុពេកនោះទេ។
មនុស្សម្នាក់ៗរស់នៅមានស្ថានភាពគ្រួសារ និងការយល់ដឹងខុសៗគ្នា។
ដូច្នេះ ទាំងឪពុកម្តាយ
និងយុវជនត្រូវចេះមានដែនកំណត់នៃការចង់មានចង់បានរបស់ខ្លួន
នោះទើបជីវិតរស់នៅប្រកបដោយសុភមង្គល៕
ប្រភព ៖ ភ្នំពេញប៉ុស្តិ៍
No comments:
Post a Comment