NASTO PPA: យុវជនគួរនាំគ្នាធ្វើចំណាកស្រុកទៅធ្វើការនៅបរទេស?

«ខ្ញុំអាចរកចំណូលប្រហែលជា ១ម៉ឺនបាត (ប្រមាណជា ៣០០ដុល្លារ) ក្នុងមួយខែ បើធៀបនឹងការធ្វើការនៅស្រុកខ្មែរវិញ ខ្ញុំទទួលបានប្រាក់ខែត្រឹមតែ៧០ដុល្លារប៉ុណ្ណោះ»។ សម្តីមួយប្រយោគនេះ បានបង្ហាញពីមូលហេតុដែលកញ្ញា អឿ អាន អាយុ២៥ឆ្នាំ សម្រេចចិត្តទៅធ្វើការជាកម្មការិនីរោងចក្រនៅប្រទេសថៃ រយៈពេល៣ខែទៀត។

ប្រាកដណាស់ ប្រជាពលរដ្ឋកម្ពុជាមួយចំនួន ពិតជាមានបំណងទៅធ្វើការនៅបរទេសដោយផ្ដោតចម្បងលើប្រាក់ចំណូល ខ្ពស់។ យុវជនដែលត្រៀមខ្លួនចេញទៅធ្វើជាកម្មករនៅក្រៅស្រុក លោក សុខ ណា អាយុ២៤ឆ្នាំ ក៏បានលើកឡើងពីមូលហេតុផ្ទាល់ខ្លួនថា៖ «ទៅធ្វើការនៅប្រទេសគេ មិនត្រឹមតែបានប្រាក់ខែច្រើនប៉ុណ្ណោះទេ ប៉ុន្តែយើងថែមទាំងមានឱកាសបានទៅស្គាល់ និងឃើញពិភពខាងក្រៅទៀតផង»។

ប្រសិនបើយើងក្រឡេកមើលតែមួយ ជ្រុង យើងនឹងឃើញពីអត្ថប្រយោជន៍ចំពោះការងារចំណាកស្រុក ប៉ុន្តែពួកគេអាចប្រឈមនឹងបញ្ហាជាច្រើន រួមទាំង ការស៊ាំនឹងអាកាសធាតុ ទំនាក់ទំនង ការនឹកស្រុកកំណើត និងផ្ទះសម្បែង ការដើរហើរ ជាពិសេស ការអនុវត្ដការងារជាក់ស្ដែង។

លោក មករា ជាពលករធ្វើការនៅប្រទេសកូរ៉េ តាំងពីឆ្នាំ២០០៣ បានលាតត្រដាងពីបញ្ហាខ្លះៗ ដែលលោកបានជួបប្រទះផ្ទាល់នៅពេលទៅដល់ប្រទេសកូរ៉េដំបូងថា៖ «ធម្មតាទេ ស្រុកគេមិនដូចស្រុកយើងឡើយ។ ខ្ញុំពិបាកទ្រាំនឹងអាកាសធាតុណាស់ ព្រោះវាត្រជាក់ខ្លាំង និងអាចធ្វើឲ្យយើងហូរឈាមច្រមុះទៀត»។ ឯទំនាក់ទំនងប្រើភាសាក្នុងពេលបំពេញការងារជាមួយបរទេស និងម្ហូបអាហារ ក៏ជាផលលំបាករបស់លោក មករា ផងដែរ។ លោក បានរំឭកពីហេតុការណ៍គួរឲ្យរន្ធត់ដែលមិនអាចបំភ្លេចបាននោះគឺ ពលករខ្មែរម្នាក់ ដេកស្លាប់យ៉ាងអាណោចអាធ័ម ពីព្រោះវាអាចបណ្ដាលមកពីបាក់កម្លាំង ចាញ់អាកាសធាតុ និងហូបមិនគ្រប់គ្រាន់។

ការងារលំបាករបស់ពលករខ្មែរនៅបរទេស គឺជាបញ្ហាដ៏ធំមួយ ប៉ុន្ដែក្ដីបារម្ភរបស់ឪពុកម្ដាយ ឬក៏អាណាព្យាបាល ក៏ជាកង្វល់ដេកមិនលក់ បក់មិនល្ហើយផងដែរ។

លោក យេង សុផល ក្នុងនាមជាឪពុកដែលកូនប្រុសម្នាក់ទៅធ្វើការស្រុកក្រៅ បានបង្ហាញពីការព្រួយបារម្ភរបស់ខ្លួនថា៖ «ខ្ញុំចេះតែខ្លាចកូនរាប់អានមិត្តខុស ហើយណាមួយបារម្ភខ្លាចគេចាប់កូនផង និងមិនដឹងពីសុខទុក្ខកូនយ៉ាងណាទេ»។ យ៉ាងណាមិញ លោកបានទទួលស្គាល់ថា៖ «ការពិតទៅ ធ្វើការនៅស្រុកគេមិនបានចំណូលអីច្រើនទេ ធៀបនឹងស្រុកយើង បើមិនធ្វើការថែមម៉ោង»។

ពាក់ព័ន្ធទៅនឹងសុវត្ថិភាពរបស់ពលករ ចំណាកស្រុក បើយោងតាមលោក ឃ្លាំង រីម ជាអ្នកសម្របសម្រួលគម្រោងត្រីកោណនៅអង្គការពលកម្មអន្តរជាតិ (ILO) ប្រចាំប្រទេសកម្ពុជា បានឲ្យដឹងថា បញ្ហាប្រឈមដែលពលករទៅធ្វើការក្រៅប្រទេស គឺអាស្រ័យទៅលើទីកន្លែងការងារថាតើគាត់ជាស្រីឬប្រុស រួមទាំងកត្តាជាច្រើនទៀត។

លោកបានបន្តថា៖ «បញ្ហាទាំងនោះមានដូចជា ការទំនាក់ទំនង ចំណេះដឹងវប្បធម៌ សិទ្ធិ និងវិធីការពារសិទ្ធិរបស់ខ្លួន ដើម្បីបញ្ចៀសការកេងយកផលចំណេញ និងរំលោភបំពានផ្សេងៗ»។

យ៉ាងណាមិញ បញ្ហាទាក់ទងនឹងសុវត្ថិភាពរបស់ពលករចំណាកស្រុក តែងតែត្រូវបានចុះផ្សាយក្នុងអត្ថបទកាសែតជារឿយៗ។ ជាក់ស្តែង ភ្នំពេញ ប៉ុស្តិ៍ បានចុះផ្សាយកាលពីថ្ងៃទី៣ ខែកក្កដាកន្លងទៅថា ពលការិនី ម៉ែន ចន់វាសនា ជាអ្នកបម្រើការងារតាមផ្ទះកម្ពុជាដំបូងដែលបានប្តឹងផ្តល់ឈ្នះ ក្តីរវាងថៅកែរបស់នាងនៅតុលាការម៉ាឡេស៊ី ដែលឆ្លុះបញ្ចាំងអំពីការរំលោភសិទ្ធិពីថៅកែទៅលើកូនឈ្នួល។ រីឯកាសែតកោះសន្តិភាព បានផ្សាយថា ពលករខ្មែរម្នាក់ដែលស្លាប់ក្នុងទឹកដីថៃបានត្រូវភាគីថៃបញ្ជូន មកវិញតាមច្រកទ្វារអន្តរជាតិប៉ោយប៉ែត ម៉ោង១រសៀល ថ្ងៃទី២៤ ខែមេសា ឆ្នាំ២០១២។ ចំណែកឯកាលពីថ្ងៃទី២០ ខែមិថុនា ភ្នំពេញ ប៉ុស្តិ៍ ដដែល ក៏បានផ្សាយអំពីថៃចាប់កម្មករខ្មែរស្របច្បាប់៤០នាក់កោរសក់ សម្រាតខោអាវ ជំរិតយកប្រាក់ ដែលពួកគេជាកម្មករសំណង់ស្របច្បាប់ និងមានលិខិតឆ្លងដែនត្រឹមត្រូវ។

ថ្វីដ្បិតតែបញ្ហាជីវភាព និងប្រាក់កម្រៃថោក ជាមូលហេតុជំរុញឲ្យពួកគេធ្វើចំណាកស្រុកកាន់តែច្រើនយ៉ាង ណាក៏ដោយ ប៉ុន្តែប្រជាពលរដ្ឋខ្មែរជាច្រើនផ្សេងទៀតក៏មិនគាំទ្រនឹងការងារ ចំណាកស្រុកដ៏ប្រថុយប្រថាននោះឡើយ។ ម្យ៉ាងវិញទៀត ការធ្វើចំណាកស្រុក អាចធ្វើឲ្យប្រទេសយើងខ្វះកម្លាំងពលករ ឬធនធានមនុស្សដើម្បីអភិវឌ្ឍជាតិ។

លោក ហា ចំរុង អាយុ២៤ឆ្នាំ ជាកម្មករសំណង់ បានសម្តែងពីការមិនគាំទ្រចំពោះការងារចំណាកស្រុកថា៖ «បើឲ្យខ្ញុំទៅធ្វើការនៅស្រុកគេ និងនៅទីនេះ ខ្ញុំសុខចិត្តធ្វើការនៅទីនេះវិញ ពីព្រោះខ្ញុំមិនចេះភាសាគេ ណាមួយបែកឆ្ងាយពីគ្រួសារ និងធ្លាប់ដឹងឮពីបញ្ហាដែលកើតឡើងជាហូរហែ»។

ជម្រើសមិនធ្វើ ចំណាកស្រុក ត្រូវបានគាំទ្រដោយលោកនាយករដ្ឋមន្រ្ដី ហ៊ុន សែន ដែលបានថ្លែងក្នុងឱកាសសម្ពោធឲ្យប្រើប្រាស់តំបន់សេដ្ឋកិច្ចពិសេស កំពង់ផែក្រុងព្រះសីហនុ កាលពីថ្ងៃទី០១ ខែឧសភា ឆ្នាំ២០១២។ លោក ហ៊ុន សែន បានអំពាវនាវដល់ប្រជាពលរដ្ឋខ្មែរគ្រប់រូបដែលកំពុងធ្វើដំណើរទៅ ធ្វើការនៅក្រៅប្រទេសឲ្យត្រឡប់មកស្រុកវិញ ដោយហេតុថា ធនធានមនុស្សរបស់យើងនៅមានកម្រិតសម្រាប់បម្រើដល់វិស័យកសិកម្ម ឧស្សាហកម្ម និងវិស័យសំណង់ជាដើម។

ដោយឡែក ការឆ្លងដែនទៅធ្វើការនៅបរទេសខុសច្បាប់ មិនមែនជាវិធីដ៏ល្អនោះទេ ខណៈរាជរដ្ឋាភិបាលនៃព្រះរាជាណាចក្រកម្ពុជា កំពុងតែព្យាយាមធ្វើលិខិតសម្គាល់ឲ្យពលករ ដែលទៅធ្វើការខុសច្បាប់លើកមុនៗ។

សរុបមក ផលប្រយោជន៍ និងបញ្ហាប្រឈមរបស់ពលករចំណាកស្រុកកម្ពុជា នៅតែជាក្ដីកង្វល់របស់ប្រជាពលរដ្ឋ និងរាជរដ្ឋាភិបាល។

ដើម្បី ធានាដល់សុវត្ថិភាព បើអ្នកចង់ទៅបម្រើការនៅបរទេស អ្នកគួរតែពិចារណាឲ្យបានហ្មត់ចត់ចំពោះបញ្ហាធ្លាប់កើតឡើង ទាំងនេះ និងគួរស្វែងយល់ពីស្ថាប័ន ឬកន្លែងធ្វើការដែលអ្នកនឹងទៅធ្វើនោះថាតើអាចទុកចិត្តបានដែរ ឬទេ។

ម្យ៉ាងវិញទៀត យោងតាមប្រសាសន៍របស់លោកនាយករដ្ឋមន្ដ្រី ហ៊ុន សែន ក៏ដូចជាទិដ្ឋភាពការងារជាក់ស្តែងនៅកម្ពុជា យើងឃើញថា ឱកាសការងារ ក្នុងស្រុក នៅតែមានច្រើន ឲ្យតែយើងម្នាក់ៗព្យាយាមតស៊ូពុះពារ និងខិតខំពង្រឹងសមត្ថភាពរបស់ខ្លួនបានល្អប្រសើរ នោះជោគជ័យក្នុងជីវិតនឹងកើតឡើងជាក់ជាមិនខាន៕

ប្រភព ៖ ភ្នំពេញប៉ុស្តិ៍

Tuesday, August 21, 2012

យុវជនគួរនាំគ្នាធ្វើចំណាកស្រុកទៅធ្វើការនៅបរទេស?

No comments:

Post a Comment