NASTO PPA: យុវជនគួរតែចំណាយពេលតាមទៅគាំទ្រតារារហូតដល់ភ្លេចការសិក្សាឬ?

ក្រុមអ្នកគាំទ្រតារាដែលគេស្គាល់ជាភាសាអង់គ្លេសថា«Fan»បាន និងកំពុងតែទទួលការចាប់អារម្មណ៍យ៉ាងខ្លាំងពីមហាជនកម្ពុជា។ យើងអាចកត់សម្គាល់បានថាក្រុមអ្នកគាំទ្រតារាភាគច្រើនសុទ្ធតែជា យុវវ័យប្រុសស្រីក្មេងដែលចូលចិត្តវិស័យចម្រៀងហើយស្ម័គ្រចិត្ត ធ្វើជាអ្នកគាំទ្រយ៉ាងពេញទំហឹងចំពោះតារាដែលខ្លួនពេញចិត្ត។ អាកប្បកិរិយារបស់ក្រុមគាំទ្រតារាមានសកម្មភាពពុះកញ្ជ្រោលខ្លាំង ខុសពីអ្នកគាំទ្រធម្មតាព្រោះពួកគេគឺជាអ្នកគាំទ្រដែលមានទំនាក់ ទំនងជិតស្និទ្ធជាមួយនឹងតារាផ្ទាល់ហើយពួកគេក៏តែងតែប្រមូលផ្តុំ គ្នានៅមុខឆាកតន្ត្រីរៀងរាល់ពេលដែលមានវត្តមានរបស់តារាចម្រៀង ល្បីក្នុងដួងចិត្តទៅច្រៀងនៅតាមប៉ុស្តិ៍ទូរទស្សន៍ឬការប្រគំ តន្ត្រីនានា។

ជាការពិតយើងប្រាកដជាមានការកោតសរសើរចំពោះក្រុមហ្វេនដែលតែង តែជួយគាំទ្រតារាខ្មែរយើងដោយទឹកចិត្តស្មោះសរស្ទើរតែគ្រប់ពេល វេលានិងគ្រប់ទីកន្លែងប៉ុន្តែតើការគាំទ្រតារាជាក្រុមហ្វេនបែប នេះអាចធ្វើឲ្យយុវវ័យរបស់យើងចំណាយពេលវេលាច្រើនភ្លេចការសិក្សា និងបង្កើននូវភាពស្និទ្ធស្នាលជ្រុលហួសហេតុដែលអាចប៉ះពាល់ដល់ វប្បធម៌ខ្មែរដែរឬទេ?

យុវជនមា្នក់ឈ្មោះ ឈុន នីជាមេក្រុមអ្នកគាំទ្រតារាល្បីមួយរូបនៅក្នុងផលិតកម្មធំមួយ បាននិយាយថាក្រុមរបស់លោកមានចំនួនប្រមាណជាជាង៤០នាក់តែងតែឆ្លៀត ពេលទំនេរពីការសិក្សាទៅតាមគាំទ្រតារារបស់ពួកលោកគ្រប់កម្មវិធី តន្ត្រី។ លោកបញ្ជាក់ថាការគាំទ្រនិងការបង្កើតជាក្រុមហ្វេននេះមិនមែនជា ការរៀបចំពីម្ចាស់ផលិតកម្មឬអ្នកចម្រៀងនោះទេប៉ុន្ដែវាសុទ្ធតែ ផ្តើមចេញពីការស្ម័គ្រចិត្តប៉ុណ្ណោះ។

លោក ឈុន នី បន្តថាចំពោះការចំណាយផ្សេងៗ ដូចជាការធ្វើស្លាកគាំទ្រអគ្គិសនីកាដូតុក្កតាឬផ្កាដែលទិញ សម្រាប់ផ្តល់ជូនតារារបស់ពួកលោកនៅលើឆាកនោះគឺសុទ្ធតែបានមកពី ការរៃអង្គាសឬក៏ជាថវិកាបានមកពីសមាជិកណាមួយនៃក្រុមហេ្វនទាំង មូល។ជាងនេះទៅទៀតអ្វីៗដែលក្រុមហ្វេនរបស់លោកធ្វើគឺជាសន្តាន ចិត្តចំពោះការស្រឡាញ់សិល្បៈ និងតារារបស់ពួកលោកប៉ុណ្ណោះ។

ការបង្កើតក្រុមគាំទ្រតារាអាចជាវិធីសាស្ត្រល្អមួយក្នុងការជួយ លើកស្ទួយសិល្បៈចម្រៀងខ្មែរយើងបច្ចុប្បន្នមែនប៉ុន្តែវាក៏អាចជះ ឥទ្ធិពលអវិជ្ជមានមួយចំនួនផងដែរសម្រាប់យុវវ័យដែលមិនបានគិតគូរ ដិតដល់ចំពោះបញ្ហានេះ។

អ្នកស្រី នង ធីតា អាយុ៥២ឆ្នាំជាគណនេយ្យករនៃស្ថាប័នរដ្ឋមួយកន្លែងបានបញ្ចេញនូវ ទស្សនៈមិនសូវពេញចិត្តចំពោះការចំណាយពេលវេលានិងលុយកាក់របស់ យុវវ័យដើម្បីទៅធ្វើការគាំទ្រតារានេះថាបើជាការគាំទ្រធម្មតាគឺ មិនថ្វីនោះទេ ប៉ុន្តែបើពួកក្មេងៗទាំងនេះបានចំណាយពេលច្រើនរួមទាំងលុយកាក់ សម្រាប់ទៅគាំទ្រតារាគ្រប់កម្មវិធីនោះគឺពិតជាមិនល្អឡើយ។

អ្នកស្រីបានបញ្ជាក់ប្រាប់ថា៖«បើកូនខ្ញុំវិញខ្ញុំនឹងមិនឲ្យ ទៅគាំទ្រតារាអីដល់ថ្នាក់ហ្នឹងទេព្រោះវាចោលពេលវេលាអត់ ប្រយោជន៍ហើយខ្ញុំក៏ចង់ផ្តាំដល់ក្មេងៗទាំងឡាយសូមកុំចំណាយពេល វេលាទៅរឿងអ៊ីចឹងច្រើនពេក។ សូមឲ្យពួកគេគាំទ្រដល់តារាល្មមៗទៅបានហើយទុកពេលរៀនសូត្រវិញ ប្រសើរជាង»។

កញ្ញា ម៉ូលីកា វ័យ២៤ឆ្នាំជាបុគ្គលិកផ្នែកជំនួយការផលិតនៃអង្គការមួយនៃរាជធានី ភ្នំពេញបាននិយាយពីការមិនពេញចិត្តនូវទង្វើដែលពួកក្រុមអ្នក គាំទ្រតារាទាំងនោះធ្វើថា៖ «ខ្ញុំហួសចិត្តនៅពេលដែលខ្ញុំបានមើលវីដេអូមួយតាមរយៈគេហទំព័រ ហ្វេសប៊ុកដែលក្រុមហេ្វនរបស់តារាមួយក្រុមបានធ្វើខួបកំណើតឲ្យ តារាចម្រៀងល្បីម្នាក់។ ពួកគេអង្គុយបត់ជើងនៅខាងក្រោមតារាក្នុងដួងចិត្ដរបស់ពួកគេ អង្គុយលើកៅអីហើយពួកគេលើកនំខួបកំណើតផងច្រៀងផងដែលអ្នកខ្លះទៀត បញ្ចេញនូវក្តីរំភើបដល់ថ្នាក់ចង់រលីងរលោងទឹកភ្នែក។ខ្ញុំគិតទៅ វាដូចជាហួសហេតុមែនទែនហើយខ្ញុំចង់ដឹងថាតើពួកគេដែលធ្លាប់ ធ្វើបែបហ្នឹងដាក់ឪពុកម្តាយរបស់ពួកគេដែរឬទេ?»។

យ៉ាងណាមិញបើយើងងាកទៅជ្រុងម្ខាងទៀតនៃអ្នកគាំទ្រទាំងនោះយើង អាចសង្កេតឃើញថាការគាំទ្រហួសហេតុរវាងអ្នកគាំទ្រនារីនិងអ្នក ចម្រៀងបុរសដែលបង្ហាញចេញជាភាពស្និទ្ធស្នាលខ្លាំងក៏អាចបង្កផល ប៉ះពាល់ដល់វប្បធម៌ខ្មែរផងដែរ។

លោក ម៉ៅ កេង ប្រធាននាយកដ្ឋានសិល្បៈទស្សនីយភាពមានប្រសាសន៍ថាតាមពិតទៅ សង្គមមានការជឿនលឿនដូច្នេះការស្រឡាញ់ចូលចិត្តតារានិងក្រុម គាំទ្រតារាគឺវាជារឿងធម្មតាទេ ពីព្រោះវាអាចជាទំនើបកម្មនៃពិភពលោក។ប៉ុន្តែលោកក៏មានការមិនពេញ ចិត្តចំពោះក្មេងៗខ្លះដែលពួកគេមិន គួរបង្ហាញចេញនូវភាពស្និទ្ធស្នាលពេករហូតដល់ហក់ឱបថើបតារាដែល ខ្លួនបានស្រឡាញ់ចូលចិត្តនោះទេពីព្រោះទង្វើបែបនេះអាចប៉ះពាល់ ដល់ប្រពៃណីជាតិ។

កញ្ញា ពេជ្រ សោភា ជាតារាល្បីមួយដួងប្រចាំផលិតកម្មហង្សមាស និងមានក្រុមអ្នកគាំទ្រជាច្រើននាក់ បាននិយាយថា៖ «ខ្ញុំមានអារម្មណ៍សប្បាយចិត្តនៅពេលដែលទទួលបានការគាំទ្រច្រើន ប៉ុន្តែចំពោះការស្និទ្ធស្នាលរវាងក្រុមហេ្វនមកលើខ្ញុំដូចជាការ ថើបមិនសូវមានទេតែបើមានក៏ខ្ញុំមិនសូវប្រកាន់ដែរពីព្រោះនេះ គ្រាន់តែជាការស្រឡាញ់ចូលចិត្តរបស់គាត់»។

យ៉ាងណាមិញ កញ្ញាថ្លែងសារភាពថា៖«ខ្ញុំក៏មើលលើអាយុរបស់ពួកគាត់ដែរបើជាប្អូនៗខ្ញុំមិនថាអីនោះទេ»។

កញ្ញា ពេជ្រ សោភា បានបញ្ជាក់ថា៖ «ខ្ញុំចង់ប្រាប់ថាបើអ្នកទាំងអស់គ្នាស្រឡាញ់ខ្ញុំអ្នកត្រូវ ស្រឡាញ់ខ្លួនឯងនិងគ្រួសារឲ្យបានច្រើនទើបល្អ»។

ពិតប្រាកដណាស់សិល្បៈតែងតែត្រូវការការគាំទ្រហើយការបង្កើតជា ក្រុមអ្នកគាំទ្រនេះក៏ជាកត្តាល្អមួយសម្រាប់រុញច្រានវិស័យសិល្បៈ ខ្មែរឲ្យមានការរីកចម្រើន។ប៉ុន្ដែប្រិយមិត្តទាំងឡាយគួរតែគិត គូរពីបញ្ហាអវិជ្ជមានដែលអាចកើតមានឡើងព្រោះបើតាមបទពិសោធរបស់ ខ្ញុំផ្ទាល់ការសិក្សាគឺត្រូវការពេលច្រើនដើម្បីធ្វើការហ្វឹក ហាត់ទើបមានលទ្ធផល។

ដូច្នេះ យុវវ័យគួរចំណាយពេលទំនេរពីម៉ោងសិក្សានៅសាលាទៅគិតគូរពីការ សិក្សាបន្ថែមដែលអាចផ្ដល់ពន្លឺសម្រាប់អនាគតរបស់យើងវិញវាប្រសើរ ជាងរីឯការគាំទ្រឬស្រឡាញ់ចូលចិត្តតារារូបណា យើងមិនត្រូវភ្លេចខ្លួនគិតតែពីរឿងដើរតាមតារាហើយលែងរវីរវល់ ការសិក្សានោះទេ៕

ប្រភព ៖ LIFT

Saturday, February 2, 2013

យុវជនគួរតែចំណាយពេលតាមទៅគាំទ្រតារារហូតដល់ភ្លេចការសិក្សាឬ?

No comments:

Post a Comment