NASTO PPA: ភេសជ្ជៈស្ករខ្ពស់បង្កើនកម្លាំង ឬបន្ថយសុខភាព?

នៅពេលបច្ចុប្បន្ននេះ ភេសជ្ជៈបំប៉នកម្លាំងមានការពេញនិយមខ្លាំងក្នុងស្រទាប់យុវវ័យ។ ភេសជ្ជៈមួយនេះផ្តល់ទាំងគុណប្រយោជន៍ និងគុណវិបត្តិ ដែលមានគុណសម្បត្តិរបស់វា ជួយដល់អ្នកពិសាឲ្យមានកម្លាំងកំហែង បំបាត់ការស្រេកទឹក ក៏ដូចជាចូលរួមក្នុងការបង្កើនភាពសប្បាយរីករាយក្នុងការជួបជុំ គ្នាផងដែរ។

ជាងនេះទៅទៀត ការទទួលទានភេសជ្ជៈបំប៉នកម្លាំងក៏ត្រូវបានណែនាំដោយគ្រូពេទ្យ មួយចំនួនទៅដល់អ្នកជំងឺរបស់គាត់ ពេលដែលអ្នកជំងឺនោះអស់កម្លាំងនិងល្ហិតល្ហៃជាដើម។

កញ្ញា សួស សុខសេរី និស្សិតផ្នែកភាសាអង់គ្លេសម្នាក់បានប្រាប់ថា បងស្រីរបស់កញ្ញាមានការនឿយហត់អស់កម្លាំងហើយបងស្រីកញ្ញាបានទៅ ជួបគ្រូពេទ្យនិងពិភាក្សាយោបល់ជាញឹកញាប់ ហើយគ្រូពេទ្យបានប្រាប់ថាឲ្យ ឧស្សាហ៍ផឹកភេសជ្ជៈផ្អែមៗ ប៉ូវកម្លាំងជាប្រចាំ ព្រោះអាចជួយឲ្យគាត់មានជាតិស្ករក្នុងខ្លួនគ្រប់គ្រាន់ ពេលគាត់ឈឺ»។

ទោះបីជាភេសជ្ជៈបំប៉នកម្លាំងផ្តល់នូវគុណសម្បត្តិយ៉ាងច្រើនក៏ដោយក៏វាផ្តល់នូវផលប៉ះពាល់ផងដែរ។

យោងតាមសម្តីរបស់លោកស៊ីម ធីតា វេជ្ជបណ្ឌិតជំងឺទូទៅ នៅមន្ទីរសម្រាកព្យាបាលនិងសម្ភពអរុណរះ បានឲ្យដឹងថា ការទទួលទានភេសជ្ជៈបំប៉នកម្លាំងអាចជំរុញឲ្យមានជាតិស្ករក្នុងឈាម ខ្ពស់។ លោកក៏បញ្ជាក់ដែរថា ឲ្យតែជាតិស្ករក្នុងខ្លួនរបស់មនុស្សស្មើ ឬលើសពី ១២៦ ដែលវាស់ដោយឧបករណ៍ពិនិត្យជាតិស្ករក្នុងឈាម (កំណត់ដោយអង្គការសុខភាពពិភពលោក) មិនថាចំពោះយុវវ័យឬមនុស្សចាស់ទេពួកគាត់គឺកំពុងតែមានជំងឺទឹក នោមផ្អែមក្នុងខ្លួន ។

លោកវេជ្ជបណ្ឌិតបានពន្យល់បន្ថែមថា៖ «វាក៏អាស្រ័យលើកត្តាជាច្រើនដែរដូចជាវ័យ ពូជ ភាពធាត់ និងទម្លាប់នៃការរស់នៅជាដើម ដែលជំរុញឲ្យមានអ្នកជំងឺជាតិស្ករស្រាប់មានជាតិស្ករក្នុងខ្លួន កាន់តែច្រើនឡើងរហូតដល់ហួសកម្រិត»។

រីឯយុវវ័យខ្លះដែលគាត់មានការមមាញឹកខ្លាំងក្នុងការសិក្សានិង ការងារ បានជ្រើសយកភេសជ្ជៈបំប៉នកម្លាំងមកធ្វើជាដំណោះស្រាយ។

អ្នកស្រី ចំរើន ជាអាជីវករម្នាក់បាននិយាយប្រាប់ពីការអង្កេតនៃការលក់ដូររបស់គាត់ ថា៖ «អតិថិជនដែលទិញភេសជ្ជៈប៉ូវកម្លាំងភាគច្រើនគឺជាយុវវ័យ ក្មេងៗសិស្សសាលា»។ អ្នកស្រីបានបន្ថែមថា អ្នកដែលទិញភេសជ្ជៈ គឺជាមនុស្សដដែលៗ ដែលពួកគាត់និយមរសជាតិរបស់វា។

ជាក់ស្តែង ពេលកំពុងរវល់និងមមាញឹកនឹងការសិក្សា លោក ឱម ដារ៉ារុណ ដែលជានិស្សិត និងជាវិស្វករមួយរូបបានរៀបរាប់ថា ដោយសារតែជាប់រវល់នឹងការសិក្សានិងការងារដែលស្ទើរតែរកពេល សម្រាកគ្មានលោកដារ៉ារុណតែងតែទទួលទានភេសជ្ជៈដែលមានជាតិស្ករ ដើម្បីបំប៉នកម្លាំង។លោកបានបញ្ជាក់ថា៖«ពេលអស់កម្លាំងខ្ញុំចូល ចិត្តញ៉ាំភេសជ្ជៈផ្អែមៗព្រោះវាធ្វើឲ្យមានខ្ញុំកម្លាំង ហើយប្រសិនបើការងារមមាញឹកខ្លាំង ខ្ញុំមានតែញ៉ាំកាហ្វេនៅពេលយប់ កុំឲ្យការងារធ្វើមិនទាន់ពេលវេលា»។

វិធីសាស្រ្តបែបនេះប្រហែលជាល្អក្នុងកាលៈទេសៈមួយចំនួនប៉ុណ្ណោះ ប៉ុន្តែសិស្ស-និស្សិតគួរគប្បីយល់ដឹងអំពីការប្រើប្រាស់នូវភេសជ្ជៈ បំប៉នកម្លាំងជាមុនសិនពីព្រោះសារជាតិក្នុងការបំប៉នកម្លាំងមាន ជាតិស្ករខ្ពស់ដែលអាចធ្វើឲ្យមានការកើនឡើងនូវជាតិស្ករក្នុង ខ្លួន ទោះយ៉ាងណាក៏មានភេសជ្ជៈបំប៉នខ្លះក៏មានជាតិស្ករតិចផងដែរ។

បើយោងតាមសម្តីរបស់លោក វេជ្ជបណ្ឌិតធីតា បានឲ្យដឹងបន្ថែមទៀតថា៖ «ផឹកភេសជ្ជៈមួយកំប៉ុងក្នុងមួយថ្ងៃ គឺមិនមានបញ្ហានេះទេ ប៉ុន្តែទម្លាប់ដដែលៗ មិនមែនជារឿងល្អនោះឡើយ»។

គេហទំព័រ TheSun ដែលចុះផ្សាយកាលពីថ្ងៃទី២៣ ខែតុលា ឆ្នាំ២០១២ បានឲ្យដឹងថា នៅសហរដ្ឋអាមេរិកក៏មានករណីក្មេងស្រីអាយុ១៤ឆ្នាំម្នាក់ បានស្លាប់ដោយជំងឺបេះដូងបន្ទាប់ពីផឹកភេសជ្ជៈបំប៉នកម្លាំងមួយ ប្រភេទ ដែលមានឈ្មោះថា Monster Energy Drink អស់ពីរកំប៉ុងក្នុងរយៈពេល២៤ម៉ោង ដែលគេជឿថាភេសជ្ជៈមួយនេះមានជាប់ទាក់ទងនឹងការស្លាប់របស់កុមារី រូបនោះនិងការស្លាប់៥ករណីផ្សេងទៀត។

ជាចុងក្រោយ លោកវេជ្ជបណ្ឌិត ស៊ីម ធីតា បានផ្តល់ជាយោបល់ថា ដើម្បីឲ្យមានកម្លាំងមិនអាស្រ័យទាំងស្រុងលើជាតិស្ករនោះទេ ប៉ុន្តែវាអាស្រ័យលើចំណីអាហារដែលផ្តល់ថាមពល មានជាតិសាច់ និងជាតិខ្លាញ់ជាដើម។ បន្ថែមពីលើនេះទៅទៀត យើងគួរថែរក្សាសុខភាពរបស់ខ្លួនផងដែរ ដូចជាការហាត់ប្រាណមិនជំពាក់ខ្យល់ (ហាត់ប្រាណមិនឲ្យលើសកម្លាំង) ក្នុងមួយថ្ងៃឲ្យបានកន្លះម៉ោង ហើយប្រាំថ្ងៃក្នុងមួយសប្តាហ៍៕

ប្រភព ៖ ភ្នំពេញប៉ុស្តិ៍

Tuesday, January 22, 2013

ភេសជ្ជៈស្ករខ្ពស់បង្កើនកម្លាំង ឬបន្ថយសុខភាព?

No comments:

Post a Comment