NASTO PPA: គោលដៅទីក្រុងបៃតងអាចសម្រេចបានលទ្ធផលដែរឬទេ?

ប្រសិន បើយើងធ្វើដំណើរកាត់តាមដងវិថីនានានៃរាជធានីភ្នំពេញ នោះយើងនឹងឃើញមានសុទ្ធតែមនុស្សម្នា យានយន្តធ្វើចរាចរ និងអគារជាច្រើនទាំងចាស់ ថ្មី ទាប ខ្ពស់ ផុសចេញច្រូងច្រាងពាសពេញទីក្រុងភ្នំពេញ ប៉ុន្តែពុំសូវមានទីវាលសម្រាប់សួនច្បារបៃតង ដើមឈើ ឬក៏រុក្ខជាតិបៃតងនោះទេ។ កត្តាទាំង នេះហើយ ដែលជាឧបសគ្គសម្រាប់ការធ្វើឲ្យទីក្រុងក្លាយទៅជាទីក្រុងពណ៌បៃតង។

យោង តាមរបាយការណ៍របស់កម្មវិធីទីក្រុងគំរូនៃបរិស្ថានអាស៊ាន ដែលមានស្ថិរភាពបានបង្ហាញថា ដើម្បីសម្រេចគោលដៅនៃសហស្សវត្សរ៍នៃបរិស្ថាន ត្រូវបង្កើតនូវចក្ខុវិស័យមួយ គឺការធ្វើឲ្យទីក្រុងមួយក្លាយទៅជាទីក្រុងស្អាត និងពណ៌បៃតងតាមរយៈការប្រតិបត្តិកម្មទឹកស្អាត ដីស្អាត និងខ្យល់បរិសុទ្ធដែលដើរស្របទៅនឹងកម្មវិធីទីក្រុងគំរូនៃ បរិស្ថានអាស៊ានដែលមានស្ថិរភាព។

ប៉ុន្តែទិដ្ឋភាពជារួមនៅទីក្រុងមួយនេះវាហាក់ដូចជាមិនទាន់ដើរស្របទៅនឹងចក្ខុវិស័យរបស់ខ្លួននៅឡើយទេ។

អ្នក រស់នៅក្នុងសង្កាត់បឹងសាឡាង កញ្ញា សុខា លាប វ័យ១៨ឆ្នាំដែលជានិស្សិតនៃសាកលវិទ្យាល័យភូមិន្ទភ្នំពេញ បានត្អូញត្អែរថា នៅកន្លែងដែលកញ្ញារស់នៅ គឺពុំមានទីធ្លាសម្រាប់រុក្ខជាតិពណ៌បៃតងនោះទេ ពីព្រោះវាសម្បូរទៅដោយអគារ និងបង្គោលភ្លើង។

កញ្ញាលើកឡើងថា ៖ «ខ្ញុំចង់បានទេសភាពធម្មជាតិ ដែលសម្បូរទៅដោយដើមឈើ ពីព្រោះវាធ្វើឲ្យខ្ញុំមានអារម្មណ៍ស្រស់ស្រាយ»។

រីឯកញ្ញា រ័ត្ន សុបញ្ញា វ័យ២២ឆ្នាំ ជាគណនេយ្យករនៃក្រុមហ៊ុនរ៉ាប់រងអង្គរក៏បានត្អូញត្អែរដែរថា៖ «ខ្ញុំត្រូវការទេសភាពស្រស់ត្រកាលដែលសម្បូរទៅដោយរុក្ខជាតិពណ៌ បៃតង។ ប៉ុន្តែអ្វីដែលខ្ញុំប៉ង វាហាក់ដូចជាមិនអាចទៅរួចទេ ពីព្រោះនៅទីក្រុងសម្បូរទៅដោយបង្គោលភ្លើង និងសំណង់អគារធំជាងដើមឈើ។ ខ្ញុំពិតជាសប្បាយរីករាយជាមួយនឹងទេសសភាពធម្មជាតិនៃសាកល វិទ្យាល័យភូមិន្ទភ្នំពេញII ពីព្រោះវាមានដើមឈើពណ៌បៃតង និងទីធ្លាដ៏ធំទូលាយ ដែលអាចធ្វើឲ្យខ្ញុំរំសាយទុក្ខកង្វល់បាន»។

ការ ត្អូញត្អែររបស់កញ្ញាទាំងពីរខាងលើនេះ ជាករណីមួយបញ្ជាក់ឲ្យឃើញពីកង្វះធម្មជាតិពណ៌បៃតងនៅកន្លែងដែល រស់នៅ ហើយវាជាតម្រូវការមួយសម្រាប់ការអភិវឌ្ឍបរិស្ថាននៅក្នុងទីក្រុង។

កញ្ញា កែវ កល្យាណ ដែលជាអ្នកវិភាគគម្រោងការអាកាសធាតុនៃអង្គការ UNDP បានពន្យល់ថា ទីក្រុងពណ៌បៃតងគឺមិនមែនសំដៅតែទៅលើការមានដើមឈើពណ៌បៃតង តែមួយមុខនោះទេ គឺទីក្រុងត្រូវមានការលើកកម្ពស់ការជិះកង់ ការមិនបំផ្លាញបរិស្ថាន ឬក៏ការប្រើប្រាស់ទឹកឡើងវិញតាមរយៈការចម្រោះធាតុកខ្វក់ចេញ និងការប្រើប្រាស់គ្រឿងអេឡិចត្រូនិកដែលពឹងអាស្រ័យទៅលើថាមពល ពន្លឺព្រះអាទិត្យជាដើម។

កញ្ញាបានបន្ថែមថា ប្រទេសកម្ពុជាយើងពុំទាន់មានសួនច្បារពណ៌បៃតងដែលពោរពេញទៅដោយ ដើមឈើដូចប្រទេសគេនៅឡើយទេ ដូច្នេះវាជាការប្រសើរណាស់នៅពេលដែលយើងបង្កើតឲ្យមានសួនច្បារ ទាំងនោះ សម្រាប់ផ្គាប់ចិត្តប្រជាពលរដ្ឋ និងលើកកម្ពស់សម្រស់បរិស្ថានដ៏ស្រស់ត្រកាល។

យ៉ាងណាមិញ ការប្រែក្លាយជាទីក្រុងបៃតង ដែលមានសួនច្បារនៅក្នុងទីក្រុង វាអាចនឹងប៉ះពាល់ខ្លះនៅពេលដែលធ្វើការអភិវឌ្ឍក្រុង។

លោក មាស រិទ្ធី ដែលជាអនុប្រធានការិយាល័យនៃអង្គការជាតិ និងអន្តរជាតិនៃនាយកដ្ឋានសហប្រតិបត្តិអាស៊ានរបស់ក្រសួងបរិស្ថាន បានពន្យល់ថា៖ «វាលំបាកបន្តិចនៅពេលដែលយើងបង្កើតសួនច្បារនៅក្នុងក្រុង ពីព្រោះវាអាចប៉ះពាល់ដល់ផ្ទះរបស់ប្រជាពលរដ្ឋ ប៉ុន្តែវាជាការល្អក្នុងការបង្កើតសួនច្បារនៅក្នុងការអភិវឌ្ឍខាង មុខ»។

លោកបានបញ្ជាក់ទៀតថា សាលារាជធានីតែងតែគិតគូរពីការបង្កើតនូវសួនច្បារ ឬក៏ការដាំដើមឈើនៅគ្រប់តំបន់អភិវឌ្ឍន៍ ហើយសាលារាជធានី ក៏មានគោលបំណងចង់ធ្វើឲ្យទីក្រុងភ្នំពេញក្លាយទៅជាទីក្រុង បៃតងដែរ។

បកស្រាយទៅនឹងកង្វល់ខាងលើ លោក កែប ជុតិមា អភិបាលរាជធានីភ្នំពេញ មានប្រសាសន៍ថា៖ «យើងចង់ធ្វើឲ្យទីក្រុងភ្នំពេញក្លាយទៅជាទីក្រុងពណ៌បៃតង។ ទីក្រុងពណ៌បៃតង គឺមិនសំដៅតែទៅលើដើមឈើពណ៌បៃតងតែមួយមុខទេ ប៉ុន្តែវាជាទីក្រុងដែលលើកស្ទួយបរិស្ថានផងដែរ»។

លោក កែប ជុតិមា បានបញ្ជាក់ទៀតថា សាលារាជធានី តែងតែយកចិត្តទុកដាក់ពីភាពបៃតងនៃទីក្រុង រាល់ការអភិវឌ្ឍ ដូចឃើញស្រាប់នៅតាមដងផ្លូវ និងសួនច្បារ គឺមានសុទ្ធតែដើមឈើ។

រីឯ លោក ម៉េង ប៊ុនណារិទ្ធ ជាប្រធាននាយកដ្ឋានរៀបចំដែនដីនគរូបនីយកម្ម និងសំណង់នៃអគ្គនាយកដ្ឋានក្រសួងរៀបចំដែនដី នគរូបនីយកម្ម និងសំណង់ បានអះអាងថា រាល់ការអភិវឌ្ឍនៃសំណង់អគារ ក្រសួងតែងតែយកចិត្តទុកដាក់ចំពោះការផ្សារភ្ជាប់រវាងសំណង់និង បរិស្ថាន ដែលនេះវាជាគោលការណ៍ របស់ក្រសួងបានកំណត់។

លោកបាន លើកឡើងថា៖ «យើងមានច្បាប់ដែនដីនគរូបនីយកម្មរបស់យើងសម្រាប់ជំរុញឲ្យគិត ដល់បរិស្ថានសម្រាប់ខ្យល់ដកដង្ហើម និងធ្វើឲ្យមានភាពស្រស់ស្អាតថែមទៀត»។

ជាចុងក្រោយ លោក កែប ជុតិមា បានអំពាវនាវថា៖ «ប្រជាពលរដ្ឋក៏ត្រូវតែចូលរួមនៅក្នុងការថែរក្សាបរិស្ថាននៅ ទីក្រុងដែរ ដើម្បីធ្វើឲ្យទីក្រុងរបស់យើងក្លាយទៅជាទីក្រុងបៃតង»។

ជាក់ ស្តែង រុក្ខជាតិបៃតងផ្តល់នូវសារប្រយោជន៍យ៉ាងច្រើន ដោយសារវាជាប្រភពផ្តល់នូវអុកស៊ីសែន បរិស្ថានដ៏ស្រស់ត្រកាល អាហារ និងសម្ភារបរិក្ខារជាដើម។ ការដែលគ្មានរុក្ខជាតិពណ៌បៃតងច្រើននៅគេហដ្ឋានជុំវិញខេត្ត ក្រុង វានឹងផ្តល់ផលអវិជ្ជមានជាច្រើន ដូចជាបង្កឲ្យបរិយាកាសអាប់អួរ កម្តៅឡើងខ្លាំង បាត់បង់នូវប្រភពស្រូបនូវឧស្ម័នពុលប្រភពផ្តល់អុកស៊ីសែន និងភាពទាក់ទាញពីភ្ញៀវជាតិ និងអន្តរជាតិ។

ដូច្នេះ ដើម្បីធ្វើឲ្យទីក្រុងមួយក្លាយទៅជាទីក្រុងពណ៌បៃតង រាជរដ្ឋាភិបាលកម្ពុជាគួរតែលើកកម្ពស់ការដាំដើមឈើបន្ថែមទៀតនៅ តាមដងវិថីនានានៅក្នុងទីក្រុង និងលើកទឹកចិត្តឲ្យប្រជាពលរដ្ឋដាំរុក្ខជាតិពណ៌បៃតងនៅ គេហដ្ឋានរបស់ខ្លួន។ រីឯប្រជាពលរដ្ឋ ក៏ត្រូវមានភារកិច្ចជួយអភិរក្សដើមឈើ និងសួនច្បារដែលមានស្រាប់ និងចូលរួមដាំដើមឈើបន្ថែមទៀតដែរ៕

ប្រភព ៖ ភ្នំពេញប៉ុស្តិ៍

Wednesday, September 12, 2012

គោលដៅទីក្រុងបៃតងអាចសម្រេចបានលទ្ធផលដែរឬទេ?

No comments:

Post a Comment