ការប្រើប៊្រុយយ៉ុងពេលប្រឡង |
«លួចចម្លងក្នុងពេលប្រឡង គឺជារោគពិសនៃប្រព័ន្ធអប់រំ។
វាបានធ្វើឲ្យអាប់ឱនដល់គុណតម្លៃនៃសញ្ញាបត្ររបស់ប្រទេស »។
នេះបើយោងតាមកម្មវិធីសមធម៌ ភាគទី៥៧ របស់ទូរទស្សន៍ជាតិកម្ពុជា។
ប្រាកដណាស់
ការលួចចម្លងបានរារាំងដល់ការខិតខំប្រឹងប្រែងសិក្សារបស់
សិស្សានុសិស្ស។ នៅពេលប្រឡងម្ដងៗ សិស្សខ្លះរំពឹងតែលើការបើកចម្លង
ជាជាងការប្រើសមត្ថភាពរបស់ខ្លួន។ ទង្វើបើកចម្លងទាំងអស់នេះ
សឹងតែក្លាយជាទម្លាប់នៅរៀងរាល់ការប្រឡងទៅហើយ។
ដូចដែលយើងបានឃើញស្រាប់ហើយ បើទោះជាលោកគ្រូ
អ្នកគ្រូបានរឹតបន្ដឹងយ៉ាងណាក៏ដោយ
ក៏អ្នកលួចចម្លងនៅតែមានវិធីរបស់ពួកគេ។
លទ្ធផលដែលទទួលបានពីការលួចចម្លងនៅពេលប្រឡង
ពិតជាជះឥទ្ធិពលអាក្រក់ដល់សិស្សដែលមានសមត្ថភាពពិតប្រាកដ។
ជា
រៀងរាល់ឆ្នាំ
មានរបាយការណ៍ជាច្រើនអំពីការលួចចម្លងក្នុងពេលប្រឡងថ្នាក់ជាតិ
រមែងត្រូវបានចុះផ្សាយជាហូរហែ
ប៉ុន្តែពួកគេនៅតែឆ្លៀតបើកប្រ៊ុយយ៉ុងចម្លង។ ជួនកាល
មានព័ត៌មានលេចឮពីការធ្លាយសំណៅចម្លើយទៀតផង។
តើការលួច
ចម្លងក្នុងពេលប្រឡង ជះឥទិ្ធពលអ្វីខ្លះដល់សិស្សានុសិស្សខ្លួនឯង
និងសង្គមជាតិទាំងមូល
ហើយយើងត្រូវធ្វើយ៉ាងណាដើម្បីពង្រឹងគុណភាពអប់រំ?
យោងតាម
លោក ថាវ និមល ជាគ្រូបង្រៀននៅអនុវិទ្យាល័យដង្កោ បានពន្យល់ថា៖
«ផលប៉ះពាល់ដំបូងគឺសិស្សខ្លួនឯង វាអត់មានគុណភាព
ទៅថ្ងៃមុខវាធ្វើអ្វីអត់កើត ដែលទាំងអស់នេះ
វាបង្កជាវិបត្តិសម្រាប់ខ្លួនគេ និងសង្គមទៅថ្ងៃអនាគត។
កង្វះធនធានមនុស្ស
បានជំរុញឲ្យប្រទេសជាតិអាប់ឱនកិត្តិយសនៅលើឆាកអន្តរជាតិ
ព្រោះយុវជនជាសសរទ្រូងត្រូវពុកផុយ ធ្វើការអ្វីក៏អត់កើត
ហើយវាថែមទាំងជះឥទ្ធិពលអាក្រក់ដល់អ្នកជំនាន់ក្រោយទៀតផង»។
លោក
គ្រូ បានបន្ថែមថា៖ «ដើម្បីពង្រឹងគុណភាព
យើងមិនត្រូវគិតចង់ពង្រឹងតែរយៈពេលប្រឡង២ថ្ងៃនោះទេ
ប៉ុន្ដែត្រូវគិតគូរតាំងពីពួកគេនៅរៀនថ្នាក់បឋមសិក្សាមក។
កុំឲ្យមានការចម្លង បង្រៀនសិស្សឲ្យប្រើតែសមត្ថភាពផ្ទាល់
ឲ្យសិស្សរៀនដើម្បីចេះ មិនមែនដើម្បីតែជាប់មួយមុខនោះទេ
ហើយក៏ត្រូវប្ដូរទម្លាប់លក់ដូរវិញ្ញាសាពេលប្រឡង
ព្រោះវាបានជំរុញទឹកចិត្តសិស្សឲ្យសង្ឃឹមលើការបើកចម្លង
ជាជាងសមត្ថភាព»។
មានរបាយការណ៍មួយទៀត នៅក្នុងកាសែតភ្នំពេញ
ប៉ុស្តិ៍ ចេញថ្ងៃទី២៩ ខែកក្កដា ឆ្នាំ២០០៩ សរសេរដោយ លោកឃុត
សុភចរិយា និងលោក ថា ពិសិដ្ឋ ក្រោមប្រធានបទ
«ការលួចចម្លងពេលប្រឡងដូចជាការធ្វើការងារក្រុម»។
សិស្សបាននិយាយថា ពួកគេអាចចម្លងបានតាមរយៈទូរស័ព្ទ មនុស្ស
និងការលាក់ឯកសារ ប៉ុន្តែ វាត្រូវបានក្រសួងអប់រំយុវជន
និងកីឡាធ្វើការបដិសេធ។
កញ្ញា ប៉ិច សុវណ្ណារ៉ា
ជាសិស្សថ្នាក់ទី១២ នៃវិទ្យាល័យមួយនៃរាជធានីភ្នំពេញ
បាននិយាយថា៖ «សិស្សខ្លះអត់សូវមានពេលរៀន
ព្រោះតែរវល់ការងារក្រៅឬការងារគ្រួសារ
ដូច្នេះការចម្លងគ្នាពេលប្រឡង បានជួយសម្រាលបន្ទុករបស់ពួកគេជា
ច្រើន។ រីឯសិស្សខ្លះទៀត ខិតខំព្យាយាមរៀនសូត្រដែរ
ប៉ុន្ដែហាក់ដូចជាមិនរីកចម្រើនអីសោះ។ ដូច្នេះ
ពួកគេត្រូវតែជ្រើសរើសយកវិធីនេះ»។
កញ្ញា បានអះអាងថា៖
«ចំពោះខ្ញុំផ្ទាល់
ខ្ញុំក៏បានខិតខំប្រឹងរំឭកមេរៀនសម្រាប់ពេលប្រឡងខាងមុខនេះដែរ
ប៉ុន្តែដោយសារតែមានមុខវិជ្ជាច្រើនពេក
ដូច្នេះខ្ញុំចាំអត់អស់ទេ
មានតែត្រៀមវិញ្ញាសាមេរៀនមួយចំនួនសម្រាប់ទុកបើកចម្លងប៉ុណ្ណោះ
ប្រសិនបើអាចទៅរួច»។
ឆ្លើយតបនឹងទស្សនៈរបស់យុវសិស្សខាងលើ
នេះ លោក សំ សេរីរ័ត្ន អគ្គនាយកនៃអគ្គនាយកដ្ឋានអប់រំ បានពន្យល់ថា៖
«ចំពោះពាក្យថា ដោយសារតែសំណួរចេញតែនៅក្នុងសៀវភៅ
ត្រូវតែចម្លង ដើម្បីឲ្យបានពិន្ទុច្រើននោះ គឺវាមិនពិតទេ។
គេមានវិធី និងរបៀបកែរបស់គេ»។
ចំពោះការលួចចម្លងក្នុងពេល
ប្រឡង លោក សំ សេរីរ័ត្ន បានថ្លែងប្រាប់ថា៖
«រាល់ការប្រឡងថ្នាក់ជាតិទាំងអស់ ក្រសួងអប់រំ
តែងតែចេញបទប្បញ្ញត្តិដល់សិស្ស និងគ្រូទាំងអស់រួចហើយ។
វាមិនមែនមានការលួចចម្លងនោះទេ
ហើយបើមានករណីនេះត្រូវបានរកឃើញ មែន
សិស្សដែលលួចចម្លងនោះនឹងត្រូវបញ្ឈប់ពីការប្រឡងភ្លាម»។
ជាការ
ពិត
ប្រឡងជាប់ដោយសារតែប្រ៊ុយយ៉ុងដែលមិនមែនជាសមត្ថភាពរបស់ខ្លួនឯង
នោះ បានជះឥទ្ធិពលអាក្រក់ដល់ខ្លួនប្រាកដមែន។ ជាក់ស្តែង លោក ជា
សុវណ្ណារ៉ា
ជានិស្សិតឆ្នាំទី២នៃវិទ្យាស្ថានសហប្រតិបត្តិការអន្តរជាតិកម្ពុជា
បច្ចុប្បន្នកំពុងតែប្រឈមនឹងវិបត្តិនេះ។ ជារៀងរាល់ថ្ងៃ
លោករៀនមិនទាន់គេ ព្រោះតែមូលដ្ឋានគ្រឹះមិនរឹងមាំ។
លោក
បានរៀបរាប់ទៀតថា៖ «កាលពីខ្ញុំរៀននៅវិទ្យាល័យ
ខ្ញុំមិនសូវយកចិត្តទុកដាក់រៀនប៉ុន្មានទេ
ហើយខ្ញុំគ្រាន់តែចង់លួចចម្លងពីអ្នកដទៃ យកម៉ាជាប់ប៉ុណ្ណោះ។
ដូច្នេះ នៅពេលមកសិក្សាដល់ថ្នាក់មហាវិទ្យាល័យ
ខ្ញុំពិតជាពិបាករត់តាមគេមែនទែន ពីព្រោះគេចេះ
គេមានគ្រឹះរឹងមាំ ប៉ុន្ដែសម្រាប់ខ្ញុំ អ្វីៗក៏ថ្មីទាំងអស់
ទាំងចំណេះដឹង ទាំងភាសា។ ខ្ញុំមានអារម្មណ៍ខ្មាសគេណាស់ ជាពិសេស
នៅពេលឃើញមានឈ្មោះខ្លួនឯងធ្លាក់
ខ្ញុំមិនដឹងយកមុខទៅទុកនៅណាទេ
ហើយក៏គ្មានអ្នកណាចង់ធ្វើការដៃគូ ឬក្រុមជាមួយខ្ញុំដែរ។
ជាចុងក្រោយ លោក សុវណ្ណារ៉ា បានផ្តាំផ្ញើថា៖
«សូមយុវសិស្សជំនាន់ក្រោយទាំងអស់ ខិតខំប្រឹងប្រែងរៀនសូត្រ
ត្រូវដឹងថា បើយើងមិនចេះ គឺគេមើលងាយយើងណាស់។
ប្រសិនបើយើងសង្ឃឹមលើការបើកចម្លង
នោះអនាគតរបស់យើងនឹងសូន្យតែម្តង
ពីព្រោះវាជះផលអាក្រក់ដល់យើងនៅពេលយើងចេញធ្វើការងារ
ឬនៅពេលដែលរៀនអនុវត្ដជាក់ស្តែងដែលយើងធ្វើមិនកើត។
មានខ្ញុំមួយជាគំរូ អ៊ីចឹងកុំដើរជាន់ដានរបស់ខ្ញុំ»។
ដូច្នេះ
សូមយុវជនទាំងអស់ខិតខំប្រឹងប្រែងរៀនសូត្រ
និងងាកមកប្រើសមត្ថភាពរបស់ខ្លួនដើម្បីប្រឡងយកសញ្ញាបត្រដ៏
ពិតប្រាកដ។ យើងជឿជាក់ថា
ប្រសិនបើប្អូនៗទាំងអស់ប្រឡងជាប់ដោយសមត្ថភាពខ្លួនឯង
នោះមិនថាតែប្អូនផ្ទាល់ទេ ដែលមានមោទនភាព សូម្បីតែគ្រួសារ
និងសង្គមជាតិខ្មែរទាំងមូល ក៏មានកិត្តិយសផងដែរ៕
ប្រភព ៖ សារព័ត៌មានភ្នំពេញប៉ុស្តិ៍
No comments:
Post a Comment